नेपालगन्ज ३१ असोज : प्रतिनिधि सभा तथा प्रदेशसभा सदस्य निर्वाचन प्रचार प्रसारको लागि नेकपा एमालेले आज बाँके क्षेत्र नम्बर–३ प्रदेश ‘ख’ को सम्पर्क कार्यालय स्थापना गरेको छ ।

जानकी गाउँपालिका–४ खजुराखुर्दमा एक समारोहका बीच नेकपा एमाले बाँकेका अध्यक्ष एवम् बाँके क्षेत्र नम्बर–३ प्रतिनिधिसभा सदस्य उम्मेदवार किस्मतकुमार कक्षपति र क्षेत्र नम्बर–३ प्रदेश ‘ख’ का उम्मेदवार भीम ओलीले उद्घाटन गरेका हुन् ।

क्षेत्र नम्बर–३ प्रदेश ‘क’ को बैजनाथमा र क्षेत्र नम्बर–३ को सम्पर्क कार्यालय खजुरामा स्थापना गरेर चुनावी प्रचार अभियानलाई प्रभावकारी बनाईने एमाले बाँकेका उपाध्यक्ष डिल्ली बिसीले जानकारी दिए ।

कार्यालय स्थापना समारोहमा एमाले प्रदेश कमिटी सदस्य एकमाया बिक, जिल्ला उपाध्यक्ष डिल्ली बिसी, जानकी गाउँपालिका इन्चार्ज किशोर थापा, गाउँपालिका कमिटी अध्यक्ष बिश्रामकुमार बर्मा लगायत पार्टीका नेता कार्यकर्ताको उपस्थिति रहेको थियो ।

प्रदेश तथा क्षेत्रस्तरीय सम्पर्क कार्यालय स्थापना लगत्तै क्षेत्रभरी वडास्तरमा नेकपा एमाले र राप्रपाको संयुक्त निर्वाचन परिचालन कमिटी गठन हुने एमाले बाँकेका प्रचार विभाग प्रमुख सतिश निरौलाले बताए ।

नेकपा एमालेको तर्फबाट बाँके क्षेत्र नम्बर–३ प्रतिनिधिसभा सदस्यमा पार्टी जिल्ला अध्यक्ष किस्मतकुमार कक्षपति, प्रदेश ‘क’ मा पार्टी सचिव रत्न खत्री र प्रदेश ‘ख’ मा पार्टी सचिवालय सदस्य भीम ओली उम्मेदवार छन् ।