नेपालगन्ज १७ कार्तिकः बाँके क्षेत्र नम्बर–३ का प्रतिनिधी सभा सदस्य उम्मेदवार तथा नेपाली काँग्रेसका सहमहामन्त्री किशोरसिंह राठौरले झुटो आश्वासन नदिन निर्देशन दिएकाछन् ।

निर्वाचन क्षेत्रमा घरदैलोका क्रममा जनतालाई झुटो आश्वासन नदिन काँग्रेसका नेता, कार्यकर्तालाई राठौरले निर्देशन दिएका हुन् । बाँकेको बैजनाथमा आयोजित भेलालाई सम्बोधन गर्दै उनले यस्तो निर्देशन दिएका हुन् ।

‘हामीले चुनाव जितेपछि गर्न सक्ने काम मात्रै जनतालाई भन्ने हो, गर्न नसक्ने झुटो आश्वासन दिने होईन,’ राठौरले भने ‘काँग्रेसले अहिलेसम्म जनतालाई झुटो आश्वासन दिएको छैन, अब पनि जनतालाई झुटो र उधारो आश्वासन दिदैन ।’ गठबन्धनले जितेपछि बाँके क्षेत्र नम्बर–३ मात्र नभएर सिंगो मुलुकको समृद्धि र विकास हुने राठौरले बताए ।

सो क्रममा आफ्ना सुझाव दिदै उपस्थित काँग्रेसका नेता, कार्यकर्ताले आफुहरु टोल टोलमा परिचालित भएर गठबन्धनका उम्मेदवारलाई जिताउन सक्रिय हुने प्रतिवद्धता जनाए । काँग्रेस लगायत गठबन्धनका उम्मेदवारको पक्षमा अहिले मतदाताहरु सकारात्मक रहेको उनीहरुको भनाई थियो । नेपाली काँग्रेसका नेतादेखी कार्यकर्ता एक ढिक्का भएर चुनावमा होमिनुपर्ने अधिकांसको सुझाव थियो ।