नेपालगन्ज २५ कार्तिकः मानवसेवा आश्रमको भवन निर्माण एवंम अक्षय कोष स्थापनार्थ नेपालगन्जमा नेपथ्य लाइभ कन्सर्ट हुने भएकोछ । नेपथ्यका फ्यानहरुका लागि यो खुशीको खबर हो किनभने करिब एक दशक बढी समयपछि नेपथ्यको नेपालगन्जमा लाइभ कन्सर्ट हुन लागेको हो ।

विगत एक दशकदेखि सहयोगापेक्षी सडकआश्रित मानवहरुको सेवा गर्दै आइरहेको मानवसेवा आश्रमले नेपालगन्जमा नेपथ्य लाइभ कन्सर्ट गर्न लागेको छ । नेपालको चर्चित ब्याण्ड नेपथ्य ब्याण्डसँगको सहकार्यमा मानवसेवा आश्रमको भवन निर्माण र आश्रममा आश्रितको स्वास्थ्य उपचार तथा आपतकालिन अक्षयकोष स्थापना गर्नका लागि नेपालगन्जसहित देशका १० शहरहरुमा कार्यक्रम गर्न लागेको हो ।

कार्यक्रम मङ्सिर २९ गते नेपालगन्ज रङशालामा हुने मानवसेवा आश्रम नेपालगन्जकी सिर्जना ओलीले जानकारी दिइन् । नेपथ्य ब्याण्डका चर्चित गायक अमृत गुरुङले मानवता झल्किने र मानवता प्रवद्र्धनमा सहयोग पुग्ने गीतहरु कन्सर्टमा प्रस्तुत गर्नेछन् । नेपथ्य ब्याण्डले यसअघि विभिन्न देश परिवर्तनका नाराहरुसहित कार्यक्रम गर्दै आइरहेकोमा सन् २०२२ मा हुने यस यात्रालाई मानवताका लागि संगीत यात्रा २०२२ नाम दिएको छ ।

सोही सिलसिलामा मानवसेवा आश्रमले शुक्रबार बाँकेका पत्रकारसंग छलफल समेत गरेकोछ । आश्रमकी सिर्जना ओलीले आश्रमको भवन निर्माण तथा अक्षय कोष स्थापनाका लागि लाइभ कन्सर्ट गर्न लागेको जानकारी दिइन् ।

उनले नेपथ्यको लाइभ कन्र्सटलाई मानवताका लागि सांगीतिक यात्रा नामा दिइएको बताईन । परोपकारी तथा मानव हितका लागि भन्दै नेपथ्य र नेपथ्य ब्याण्डका चर्चित गायक अमृत गुरुङले मानवता झल्किने र मानवता प्रवद्र्धनमा सहयोग पुग्ने भएकाले पनि यो सांगतिक यात्रा तय गरेको बताईन ।

उनले यो सांगीतिक कार्यक्रमबाट मानव आश्रमको भवन र अक्षय कोष स्थापना गर्ने भएकाले कार्यक्रम सफल पार्न सबैको साथ र सहयोगको अपेक्षा राखिन् । सोक्रममा उपस्थित पत्रकारहरुले सांगीतिक कार्यक्रम सफलताका लागि आफ्ना राय, सुझाव समेत दिएका थिए ।

मानव सेवा आश्रमको बाँके, नेपालगन्ज १९ औँ जिल्ला शाखा हो । नेपालगन्ज उपमहानगरपालिका वडा नम्बर–१०, आदर्शनगरमा रहेको आश्रमको संरक्षणमा ४ बालक, १ बालिका, १ महिला र २१ जना पुरुष गरी २७ जना सहयोगापेक्षी व्यक्तिहरु रहेकाछन् ।

यहि वर्षको असार २५ गते औपचारिक रुपमा भाडाको घरमा शाखा उद्घाटन भइ सेवा सञ्चालन गरेको आश्रमले बाँके जिल्ला र यसको आसपासका छिमेकी जिल्लाहरुबाट निरन्तर उद्धार कार्य गर्दै आइरहेको छ । नयाँ शाखा भएकोले आश्रम सञ्चालनका लागि दाताहरुसम्म पुग्न केही कठिनाइका बाबजुद आगामी दिनमा वृहत्तर सेवा प्रवाह गर्ने उद्देश्य आश्रमले प्रस्तुत गरेको छ ।

यसै उद्देश्य अनुरुप मानव सेवा आश्रमको भवन निर्माणका लागि समाजसेवी जयकेश बहादुर सिंह र उनको परिवारका तर्फबाट डुडुवा गाउँपालिका वडा नम्बर–६ मा जग्गा प्रदान गरिएकोछ । सोहि जग्गामा आश्रमको भवन निर्माण कार्यलाई सुरुवात गर्नका लागि नेपथ्य ब्याण्डसँगको सहकार्यमा नेपालगन्जमा नेपथ्य लाइभ कन्सर्ट हुने भएको हो ।

एक हजार रुपैँया रहेको कार्यक्रमको टिकट मानवसेवा आश्रमको शाखा वा अनलाइनमा थुपै्र डटकम (thuprai.com/nepathya)  र इसेवा (esewaevents.com) बाट प्राप्त गर्न सकिने छ ।