अगैया(बाँके) ७ मंसिरः बाँके क्षेत्र नम्बर– १ बाट प्रतिनिधी सभा सदस्यका उम्मेदवार नेकपा एमालेका सूर्य ढकालको जित सुनिश्चित भएकोछ ।

मतगणनाको सुरुवाती चरणदेखि नै अग्रता लिएका एमालेका सूर्य बुधबार बेलुकासम्मको मत परिणामले जित सुनिश्चित गरेका हुन् ।

सूर्यले आफ्नो निकटतम प्रतिद्वन्द्वी नेकपा माओवादी केन्द्रका उम्मेदवार महेश्वरजंग गहतराज ‘अथक’लाई ३ हजार एक सय ७२ मतान्तरले पछि पारेकाछन् ।

एमालेका सूर्यले कुल १८ हजार २ सय ४४ मत ल्याउँदा माओबादी केन्द्रका अथकले १५ हजार ७२ मत प्राप्त गरेकाछन् । अथक युवा तथा खेलकुद मन्त्री हुन् ।

यस्तै नागरिक उन्मुक्ति पार्टीका सुरेश कुमार चौधरीले ८ हजार ४ सय ९२ मत प्राप्त गरेकाछन् । राष्ट्रिय स्वतन्त्र पार्टीका आनन्दबाबु काफ्लेले ५ हजार ९ सय २८, जनता समाजबादी पार्टी, (जसपा) नेपालका रामकुमार यादवले २ हजार ५०२ मत ल्याउँदा स्वतन्त्र उम्मेदवार प्रदीपकुमार शाहले ५१७ मत प्राप्त गरेकाछन् ।

गहतराजलाई सुरुवाती चरणदेखी नै पछाडी पार्दै ढकालले अग्रता लिदैँ आएका हुन् । मङ्गलबार अबेर रातीसम्म ढकालले ९ हजार १८ मत प्राप्त गर्दै अग्रता कायम राखेका थिए । भने उनका निकटतम प्रतिद्वन्द्वी अथकले ७ हजार ९ सय ६२ मत प्राप्त गरेका थिए ।

बाँके क्षेत्र नम्बर १ को मतगणना राप्तीसोनारी गाउँपालिकाको अगैयामा भइरहेकोछ ।