नेपालगन्ज ९ मंसिरः नेपालगन्ज किड्स फेस्टिवलमा बालबालिकाको उत्साहपूर्ण सहभागिता देखिएकोछ ।

नेपालगन्जको वीपि चोक स्थित सुनाखरी रेष्टूँरेण्टमा जारी नेपालगन्ज किड्स फेस्टिबलमा विभिन्न विद्यालयमा अध्ययनरत विद्यार्थी बालबालिकाको उत्साहपूर्ण सहभागिता पाइएको हो ।

मेरो टुकी प्रज्ञालय, केयर सिटी हस्पिटल एण्ड रिर्सच सेन्टर, सेतोखरी अनलाई न्यूज प्रोटल, दैनिक नेपालगन्ज र नगर स्तरीय बालक्लब सञ्जालको सहकार्यमा आयोजित नेपालगन्ज किड्स फेस्टिबल सम्भवतः जिल्लाको पहिलो किड्स फेस्टिबल हो ।

विशेषगरि ३ वर्षदेखि १८ वर्षमुनिका बालबालिकालाई लक्षित गर्दै आयोजित किड्स फेस्टिबलमा एकल तथा सामूहिक नृत्य, गायन, चित्रकला, वक्तृता, कविता, विद्यालय प्रार्थना, किड्स पेजेन्ट लगायत प्रतियोगिता गरिनेछ ।

यसका साथै अप्रतियोगितात्मक साँस्कृतिक झाँकी, खेल, खुला प्रहसन, बाहिरी स्वच्छन्द नृत्य, फोटोभिडियो लगायतका थुप्रै मनोरञ्जनात्मक कार्यक्रमसहितको बाल महोत्सव नेपालगन्जमा आयोजना गरिएको मेरो प्रज्ञालयकी प्रिन्सिपल कल्पना शर्माले जानकारी दिइन् ।

‘सिर्जनशीलता बालकको वृत्ति हो । सिर्जनाप्रतिको विस्मयभाव उसको स्वभाव । बालक स्वयम्मा सिर्जन, उमङ्ग र उत्सवको दिव्य सिर्जना हो । नाच्न, गाउन, चित्र बनाउन जान्दैन भनेर उसको सिर्जनशीलताको उपहास नगरौं ।

हरेक बच्चा सिर्जना गर्न सक्छ । सिर्जना हेरेर रमाउन सक्छ ।’ मेरो प्रज्ञालयकी प्रिन्सिपल कल्पनाले भनिन्–‘नेपालगन्ज किड्स फेस्टिवलमा ३ वर्षेदेखि १८ वर्षमुनिका बालबालिका खुसी हुने थलोको रुपमा लिएकाछौं । प्रतिश्पर्धा भएर पनि प्राथमिक तहसम्मका हरेक बालबालिकाले उपहार पाउने निराशारहित उमङ्गले भर्ने यो अभियान हो । सिर्जना गरेर वा सिर्जना हेरेर सिर्जनाप्रतिको लगाव जन्माउने जमघट हो ।’

नेपालगन्ज किड्स फेस्टिबलबाट बच्चाहरुलाई सिर्जनशीलन बनाउनु उद्देश्य रहेको मेरो टुकी प्रज्ञालयका भोजराज शर्माले बताए । उनले भने नेपालगन्ज किड्स फेस्टिबलबाट नेपालगन्जलाई चिनाउने प्रयास थालिएको हो ।

दुई दिनसम्म चल्ने किड्स फेस्टिबलको पहिलो दिन शुक्रकार मेरो नेपालगन्ज विषयमा कविता वाचन, मेरो सपना समृद्ध नेपालगन्ज विषयमा वक्तृता, गायन र एकल तथा समुहगत नृत्य, चित्रकला विधाको अडिसन सम्पन्न भएकोछ । गायन, एकल तथा समुहगत नृत्य र चित्रकला विधामा प्रिस्कुल, प्राइमेरी(कक्षा ५ सम्म) तथा खुल्ला (६ कक्षादेखि १२ कक्षासम्म) क्याटोगरिमा ३ देखि १८ वर्षसम्मका ४ सय बढि बालबालिकाले सहभागिता जनाएकाछन् ।

पहिलो दिन भएको अडिसन राउण्डमा सेलेक्ट भएका बालबालिकाले शनिबार हुने फाइनलमा सहभागिता जनाउनेछन् । अडिसन राण्डको जजमा न्यूरो सर्जन एबम गायक डाक्टर नरेन्द्र बास्कोटा तथा डान्सर सिर्जन रावल रहेका थिए । 

तस्विरहरु सबै : विजय मल्ल /सेतोखरी