नेपालगन्ज ११ मंसिरः प्रतिनिधि सभा सदस्यमा नवनिर्वाचित नेकपा (माओवादी केन्द्र)का नेता एवम् अर्थमन्त्री जनार्दन शर्मालाई नरैनापुर गाउँपालिका अध्यक्ष इश्तियाक अहमद शाहले नेपालगन्जमा भेटेर बधाई दिएका छन् । शर्मा रुकुम पश्चिमबाट काठमाडौँ फर्कने क्रममा अध्यक्ष शाहले भेटेर बधाई दिएका हुन् ।

काठमाडौ जाने क्रममा नेपालगन्ज बिमानस्थलमा पुगेका अर्थमन्त्री शर्मालाई गाउँपालिका अध्यक्ष शाहले पुष्प गुच्छा र दोसल्ला ओढाएर बधाई दिएका थिए ।

‘गाउँपालिकालाई सुन्दर बनाउनमा तपाईको साथ आवश्यक हुनेछ, तपाईसहित बाँकेबाट निर्वाचित प्रतिनिधि र प्रदेश सभाका सदस्यहरुसँग सहकार्य गरी नरैनापुरलाई समृद्ध बनाउन हामी आतुर छौँ,’ शर्माले भने ।

शिक्षा, स्वास्थ्य, कृषि लगायत समस्या समाधानका लागि संघीय सरकारको स्रोत साधन र सहकार्य आवश्यकता पर्ने उल्लेख गर्दै अध्यक्ष शाहले नवनिर्वाचित प्रतिनिधि सभा सदस्य शर्मासँग सहयोगको अपेक्षा गरेका थिए । मन्त्री शर्माले नरैनापुर आफ्नो पहिलो प्राथमिकतामा रहेकाले समृद्ध नरैनापुर बनाउन कुनै कसर बाँकी नराख्ने प्रतिवद्धता जनाए ।

अर्थमन्त्री शर्मालाई बधाई दिन बाँके प्रदेश सभा–१ (क) बाट नवनिर्वाचित प्रदेश सांसद कृष्णा केसी नमूना, नरैनापुर गाउँपालिकाका जिन्सी शाखा प्रमुख भरत महत्तो लगायत नेता कार्यकर्ताहरु बिमानस्थलमा पुगेका थिए ।