नेपालगन्ज १४ पुषः हालै सरुवा भएर आएका बाँकेका प्रहरी प्रमुख (एसपी) सन्तोषसिंह राठौरले जिल्लाको शान्ति सुरक्षा कायम गर्नु आफ्नो पहिलो जिम्मेवारी रहेको बताएका छन् ।

बाँकेका पत्रकारसँग बिहीबार जिल्ला प्रहरी कार्यालयमा गरिएको गरिएको परिचयात्मक कार्यक्रममा उनले यस्तो प्रतिबद्धता ब्यक्त गरेका हुन् ।

‘आफु जिल्लामा कार्यरत रहँदासम्म इमान्दारिता पुर्वक काम गर्ने प्रतिवद्धता ब्यक्त गर्छु’ एसपी राठौरले भने –‘जिल्लाको शान्ति सुरक्षा कायम गर्ने क्रममा सबैसँग समन्वय र सहकार्य हुन्छ, यसमा सबैको साथ र सहयोग हुनेछ ।’

‘जिल्लाको बस्तुस्थिती बुझ्न सबै तह र तप्काका ब्यक्तित्वसंग छलफल र परामर्श गरिरहेकोछु’ एसपी राठौरले भने–‘यसअघि के कसरी भइरहेको थियो त्यो भन्दा पनि समग्र जिल्लाको शान्ति सुरक्षा, अपराध तथा तस्करी नियन्त्रणका लागि म पदीय जिम्मेवारी र दायित्वबाट विमुख हुदैँन ।’

जिल्ला प्रहरी कार्यालय बाँकेको प्रमुखका रुपमा एसपी राठौर केहीदिन अघि मात्र सरुवा भएर आएका थिए । सो क्रममा उपस्थित भएका बाँकेका पत्रकारहरुले एसपी राठौरलाई जिल्लाको शान्ति सुरक्षा, अपराधलगायतका विषयमा आ–आफ्ना सुझाव दिएका थिए । प्राय बाँकेमा आउने नयाँ प्रहरी प्रमुखले हरेक पटक पत्रकार सम्मेलन गर्छन्, आफ्ना योजना सुनाउँछन्, तर उनी बिदा भएर जाँदा कार्यकालको समिक्षा र उपलब्धी सार्वजनिक नगरेरै जाने गर्दछन् ।