नेपालगन्ज १८ माघ :ठेकेदार एचडिपी कन्स्ट्रक्सन एण्ड ट्रान्सपोटेशन प्रालिका कारण बाँकेको बैजनाथमा निर्माणाधिन सिचाँचाई आयोजना अलपत्र परेको पाइएको छ ।
बैजनाथ गाउँपालिका वाड नम्बर–८ टिटिहिरियास्थित झिङ्गौरा खोलामा मूल बाँध निर्माण गरी आसपासको खेतीयोग्य जमिनमा सिँचाई पुर्याउने स्थानीयको आशा निर्माण कम्पनीको ढिलासुस्तीका कारण पुरा हुन नसकेको हो ।
जलश्रोत तथा सिँचाई विकास डिभिजन कार्यालय नेपालगन्जका अनुसार झिङ्गौरा खोलामा मूल बाँध र तटबन्धको एउटा कुलो, तटबन्ध र स–साना कल्भर्ट गरी दुई वटा छुट्टाछुट्टै टेण्डर भई सम्झौता भएको छ । सम्झौता अवधि सकिएको ७ महिना पुग्नै लाग्दा समेत उक्त आयोजनाले पूर्णता पाउन सकेको छैन ।
गत असार २८ सम्म निर्माण सम्पन्न गरिसक्नुपर्ने समायवधी रहेकोमा हालसम्म करिब ५० प्रतिशत मात्रै काम सम्पन्न भएको जलश्रोत तथा सिँचाई विकास डिभिजन कार्यालय नेपालगन्ज जनाएकोछ ।
कार्यालयका सव–ईञ्जिनियर सुरज केसीका अनुसार मूल बाँध निर्माणका लागि २०७७ असार १४ गते एक करोड २२ लाख रुपैयाँमा २०७९ असार २८ गते सम्पन्न गर्ने गरी सम्झौता भएको थियो । भने सोही आयोजना अन्र्तगत कुलो निर्माणका लागि पनि सोही मितिमा सम्पन्न गर्ने गरी सोही दिन एक करोड ४० लाख रुपैयाँमा सम्झौता भएको हो ।
सब इन्जिनियर केसीका अनुसार मूल बाँधको काम करिब ७९ प्रतिशत सम्पन्न भएको भए पनि कुलोको काम भने हाल सम्म २१ प्रतिशत मात्रै सम्पन्न भएको छ ।
यता दुवै कामको जिम्मेवारी पाएको एचडिपी कन्स्ट्रक्सन एण्ड ट्रान्सपोटेशन प्रालिले पछिल्लो समय काम अघि बढाउन उदासीनता देखाएको जलश्रोत तथा सिँचाई विकास डिभिजन कार्यालय नेपालगन्जका प्रमुख परशुराम चौधरीले बताएकाछन् ।
उनका अनुसार ठेकेदारलाई काम अघि बढाउन पटक–पटक सम्पर्कको प्रयास गरिएकोछ । कार्यालय प्रमुख चौधरीले अगाडी भने –‘घर समेत पत्ता लगाएर भेट गरेर आयोजनाको काम अगाडी बढाउन आग्रह गरेपनि काम अघि बढ्न सकेको छैन ।
आयोजना उपभोक्ता समितिका अध्यक्ष दुखराम थारुले हालसम्म काम सम्पन्न भई किसानको खेतमा सिँचाई सुविधा पुगेको हुनुपर्नेमा निर्माण कम्पनीले काम नगरिदिँदा किसानलाई नोक्सान भएको बताए ।
यस वर्षको हिँउदमा उक्त आयोजनाबाट किसानले आफ्नो खेतमा सिँचाई गरि हिँउदे बालीको खेती गर्ने आशा राखेपनि ठेकेदार कम्पनीका कारण किसानको चाहाना पुरा हुन नसकेको हो ।