नेपालगन्ज १३ चैत्र : बास नेपाल केन्द्रिय कार्यालय भवन निर्माण सहयोगार्थ बाँके क्षेत्र नम्बर–२ बाट प्रतिनिधित्व गर्ने संघीय सांसद डाक्टर धवलशम्शेर राणाले नगद सहयोग हस्तान्तरण गरेका छन् । बास नेपालको आयोजनामा सोमबार नेपालगन्जमा भएको सहयोग हस्तान्तरण कार्यक्रमकाबिच आफुले पाउने सेवासुविधाबाट डाक्टर राणाले नगद रु. ५० हजार सहयोग हस्तान्तरण गरेका हुन् ।
कार्यक्रममा बोल्दै सहयोग हस्तान्तरण कार्यक्रमका प्रमुख अतिथि समेत रहेका डाक्टर राणाले भ्रष्टाचार बिरुद्ध क्रियाशील संस्था बासले सञ्चालन गरेको अभियानले देश विकास र सुशासन वहालीमा महत्वपूर्ण भूमिका निर्वाह गर्दै आएको जनाउँदै असल कार्य गर्ने संस्थालाई आफूले पाएको सेवा सुविधाबाट सहयोग गरेको बताए ।
सुशासन प्रवद्र्धनमा कार्य गर्ने न्यून संस्थाहरु मध्ये बास रहेको जनाउँदै उनले बासको अभियानमा निरन्तर सहयोग गर्ने प्रतिबद्धता गरे । डाक्टर राणा नेपालगन्ज उपमहानगरपालिकाको रहँदा ५ वर्ष आफूले पाएको सम्पूर्ण तलबभक्ता सामाजिक कार्यमा सहयोग गरेका थिए भने संघीय सांसद भएपश्चात समेत उनले उक्त कार्यलाई निरन्तरता दिँदै आफुले पाउने सेवा सुविधा सामाजिक कार्यमा सहयोग गरेका हुन् ।
यसैगरी सहयोग हस्तान्तरण कार्यक्रममा बोल्दै बासका संस्थापक सल्लाहकार रुद्र प्रसाद तिमिल्सिनाले समाजमा भएका बिकृती, बिसंगति बिरुद्ध बोल्ने सफल संस्थाको रुपमा स्थापीत गर्न सफल भएको बताए । उनले बासको भवन निर्माण जस्तो पवित्र कार्यमा सहयोग गर्ने सबै प्रतिआभार प्रकट गरे । कार्यक्रममा गैसस महासंघ बाँकेका उपाध्यक्ष चन्द्र प्रशाद तिमिल्सना, युवा नेता ऋषिराज देवकोटा लगायतले बोलेका थिए ।
बासका केन्द्रिय अध्यक्ष लुना बुढाथोकीको अध्यक्षतामा भएको सहयोग हस्तान्तरण कार्यक्रममा बासका केन्द्रिय सचिव तथा साहित्यकार दिला शाहले बास नेपाल केन्द्रिय कार्यालय भवन निर्माण सहयोगार्थ नगद एक लाख ११ हजार १ सय एघार रुपैया सहयोग हस्तान्तरण गरेका छन् । उनले बासका केन्द्रिय अध्यक्ष लुना बुढाथोकीलाई उक्त रकमको चेक हस्तान्तरण गरेका हुन् ।
यसैगरी बास नेपाल केन्द्रिय कार्यालय भवन निर्माण सहयोगार्थ समाजसेवी तथा नेपालगन्ज–१८ निवासी रामप्रसाद पोख्रेलले नगद रु. ११ हजार १ सय हस्तान्तरण गरेका छन् ।
बासका केन्द्रिय उपाध्यक्ष शिवकुमार बर्माले सञ्चालन गरेको सहयोग हस्तान्तरण कार्यक्रममा स्वागत तथा कार्यक्रमको उद्देश्यमाथि बासका कार्यकारी निर्देशक नमस्कार शाहले प्रकाश पारेका थिए । बासले नेपालगन्ज–१८ मा केन्द्रिय कार्यालय भवन निर्माण गर्ने भएको छ ।
७ दिने उद्घोषण तालिम समापन
असलशासन मिडियाको आयोजनामा नेपालगन्जमा सञ्चालित ७ दिने आधारभुत उद्घोषण तालिम समापन भएको छ । नेपालगन्जमा सोमबार संघीय सांसद डाक्टर धवलशम्शेर राणाको प्रमुख आतिथ्यतामा भएको कार्यक्रमकाबिच तालिमको समापन गरिएको हो । समापन कार्यक्रममा तालिमका सबै सहभागिहरुलाई कार्यक्रमका प्रमुख अतिथि डाक्टर राणाले प्रमाण पत्रप्रदान गरेका थिए ।
युवाहरुको क्षमता अभिबृद्धी गर्ने उद्देश्यले आयोजित तालिमबाट बोल्ने कलाको विकास भएको सहभागिहरुले जनाएका थिए । समापन कार्यक्रममा तालिममा सहभागि रमेश ओड र पुष्पा शर्माले प्रतिक्रिया मन्तब्य राखेका थिए । तालिममा ३२ जना युवाहरुको सहभागिता रहेको थियो ।