नेपालगन्ज २२ चैत्र : राष्ट्रिय युवा संघको नवौं राष्ट्रिय महाधिवेशनको उद्घाटन समारोहमा नेकपा (एमाले) बाँकेले दश हजार बढिको सहभागितामा जनसभा गर्ने भएको छ । आगामी चैत्र २७ देखि २९ गतेसम्म बाँकेमा राष्ट्रिय युवा संघले नवौं महाधिवेशन गर्ने निर्णय गर्दै विभिन्न समिति, उपसमिति गठन गरि भब्य तयारी शुरु गरेको छ ।

नेपालगन्जमा हुन गईरहेको महाधिवेशनलाई भव्यता पूर्वक सफल बनाउन पार्टी पङ्क्ति पनि लागि परेको नेकपा एमाले केन्द्रिय सदस्य एवम् बाँके इन्चार्ज सूर्य ढकालले बताए । राष्ट्रिय युवा संघको नवौं राष्ट्रिय महाधिवेशनको जनपरिचालन समिति संयोजक समेत रहेका ढकालले महाधिवेशन उद्घाटन समारोहमा एमालेले बाँकेका ८१ वटै वडाबाट दशौं हजार जनता नेपालगन्ज उतार्ने तयारी गरेको बताए ।

राष्ट्रिय युवा संघको नवौं राष्ट्रिय महाधिवेशनलाई बाँकेमा अहिले पार्टीले सञ्चालन गरेको ‘मिसन ग्रास रुट’ अभियानसँगै प्रचार–प्रसार र तयारी भएको उनको भनाई छ ।

युवा संघका केन्द्रिय उपाध्यक्ष लुम्बिनी प्रदेश इन्चार्ज एवम् ‘राष्ट्रिय महाधिवेशन मूल व्यवस्थापन समिति’ सहसंयोजक सुमन पुरीले नेपालगन्जमा राष्ट्रिय महाधिवेशन भव्यरुपमा सफल पार्न युद्धस्तरमा तयारी भएको बताए ।

उनले प्रतिनिधि व्यवस्थापन, आवास तथा खाद्यान्न, यातायात जनपरिचालन समितिमार्फत महाधिवेशनको काम भईरहेको जानकारी दिए ।

महाधिवेशन आवास तथा खाद्यान्न समिति संयोजक एमाले बाँकेका युवा नेता रबिन्द्र लम्सालले देशभरीका दुईहजार प्रतिनिधि र अतिथिहरुको खाने बस्ने व्यवस्था गरिएको बताए । उनले नेपालगन्ज र कोहलपुरका होटलमा प्रतिनिधिहरुलाई बासको व्यवस्था गरिएको जानकारी दिए ।