नेपालगन्ज २१ चैत्रः बाँकेमा लो भोल्टेजको समस्या समाधानका लागि थप दुई स्थानमा सब स्टेसन निर्माण गर्न लागिएको छ ।
आगामी दुई वर्षभित्र सम्पन्न गर्ने गरी जिल्लाको खजुरा गाउँपालिका र जानकी गाउँपालिकामा सब स्टेसन निर्माणको थालनि गरिएकोछ । यसका लागि टेण्डर समेत भइसकेको नेपाल विद्युत् प्राधिकरण खजुरा नोलाइट शाखाका प्रमुख कृष्ण पौडेलले जानकारी दिए ।
खजुरास्थित जनक शिक्षा सामाग्री केन्द्रसँगै रहेको करिब दुई बिघा जग्गा ३३/११ केभी क्षमताको सब स्टेसन निर्माण गरिनेछ । जहाँबाट ३३ हजार किलो भोल्टको डबल सर्किट विद्युत प्रवाह हुनेछ ।
‘खजुरामा निर्माण गरिने सब स्टेसनमा १६/१६ एमभी क्षमता दुई वटा ट्रान्सफर्मर जडान गरिनेछ,’ नेपाल विद्युत् प्राधिकरण खजुरा नोलाइट पौडेलले भने, ‘११ केभी क्षमताका ८ वटा सर्किटबाट विद्युत् आउटगोइङ हुनेछ ।’ सब स्टेशनसँगै कन्ट्रोल भवन, कर्मचारी आवास निर्माण गरिनेछ ।
यस्तै जानकी गाउँपालिकामा चार बिघा जग्गामा १३२ केभिए क्षमताको सब स्टेसन निर्माण गरिने भएको छ । जहाँबाट डबल सर्किट खजुरासँग जोडिनेछ । खजुरा र जानकीमा सब स्टेसनको काम सम्पन्न भएमा न्यून भोल्टेज, छिनछिनमा विद्युत आउने जाने र बर्सातको समयमा विद्युत अनियमित हुने समस्यामा सुधार आउने प्राधिकरणले जनाएको छ ।
सबस्टेशनले जिल्लाकै समग्र विद्युत् समस्या समाधान हुने तथा औद्योगिक क्षेत्रको रूपमा विकास भइरहेको जानकी र खजुरामा दीर्घकालिन रुपमा विद्युत् समस्या नपर्ने प्राधिकरणले जनाएको छ । हाल नेपालगन्जको गोसाईगाउँ र बसपार्क तथा कोहलपुरमा सबस्टेसन छन् । नयाँ सब स्टेसन निर्माण भए पनि विद्युत आपूर्ति नियमित, विश्वसनीय र गुणस्तरीय हुने विश्वास लिइएकोछ ।