नेपालगन्ज ७ वैशाख : बाँकेमा सङ्घीय सरकारतर्फको कुल पुँजीगत विकास बजेटमध्ये ६० प्रतिशत बजेट खर्च भएको पाइएको छ । जिल्ला प्रशासन कार्यालय बाँकेले आयोजना गरेको नियमित कार्यालय प्रमुखहरूको बैठकमा उक्त कुरा जानकारी गराइएको हो । 

चालु आर्थिक वर्षको चैत मसान्तसम्म नौ महिनाको अवधिमा कुल पुँजीगत विकास बजेटमध्ये ६० प्रतिशत बजेट खर्च भएको पाइएको हो ।

चालु आर्थिक वर्षमा बाँके जिल्लामा सङ्घीय सरकारतर्फको कुल पुँजीगत (विकास) बजेट ५ अर्ब ११ करोड २९ लाख ७६ हजार रुपैयाँ विनियोजित रहेकोमा चैत मसान्तसम्ममा ३ अर्ब ७ करोड १४ लाख ५६ हजार रुपैयाँ खर्च भई वित्तीय प्रगति ६० प्रतिशत पुगेको बाँकेका प्रमुख जिल्ला अधिकारी श्रवणकुमार पोखरेलले जानकारी दिए ।

त्यसैगरी लुम्बिनी प्रदेश सरकारतर्फको कुल पुँजीगत (विकास) बजेट २ अर्ब १९ करोड ९२ लाख ४६ हजार विनियोजित रहेकोमा चैत मसान्तसम्ममा ७८ करोड २२ लाख ९३ हजार खर्च भई प्रदेशतर्फको वित्तीय प्रगति ३६ प्रतिशत मात्र रहेकोछ ।

जिल्लाका स्थानीय तहमा विकास बजेट झन् कम खर्च भएको पाइएको छ । जिल्लामा रहेका एक उपमहानगरपालिका, एक नगरपालिकासहित ८ वटा स्थानीय सरकारले यो वर्षको नौ महिनामा विकासतर्फ जम्मा २८ दशमलव ६८ प्रतिशत रकम खर्च गरेका छन् ।

८ वटै स्थानीय सरकारतर्फको कुल पुँजीगत (विकास) बजेट २५ करोड ५७ लाख विनियोजितमध्ये जम्मा ७ करोड ३३ लाख ३६ हजार रुपैयाँ खर्च भई विकास खर्चको वित्तीय प्रगति २८ दशमलव ६८ प्रतिशत मात्र रहेको उनले जानकारी दिए ।

बाँके जिल्लाका तीनै तहका सरकारहरूको चैत मसान्तसम्मको पुँजीगत खर्चको प्रगति समीक्षा गर्दा सङ्घ, प्रदेश र स्थानीय तहतर्फको क्रमशः ६० प्रतिशत, ३६ प्रतिशत र २८ दशमलव ६८ प्रतिशत पुँजीगत प्रगति देखिएकोछ ।

चालु आर्थिक वर्ष २०८०–८१ समाप्त हुन अब ३ महिना मात्र बाँकी रहेकाले विकासे कार्यालय र आयोजनाहरूले खर्च क्षमता बढाउनुपर्ने देखिएको छ ।