कोहलपुर २३ वैशाख : भारत नानपारा घर भएका राजु खान र लक्की खानले उखुको जुस बेचेरै मनग्य आम्दानी गर्न सफल भएकाछन् । कोहलपुर एनटिभी रोडमा कोठा भाडा लिएर बसेका दुई दाजुभाईले उखुको जुस बेचेरै मासिक एक लाख बढी आम्दानी गर्न सफल भएका हुन् ।  

सडकबाटै उखुको जुस बेचेर उनीहरुले राम्रै आम्दानी गरिरहेकाछन् । मौसमी व्यापार गर्न उनीहरु हरेक वर्ष भारत नानपाराबाट नेपाल आउने गर्छन् । सानो लगानीबाट शुरु गरेको यो व्यापारबाट दिनको दुई हजार देखि ४ हजारसम्म कमाइ हुने गरेको उनीहरु बताउँछन् ।

गर्मीयाममा उखुको जुसको व्यापार बढ्ने गर्छ । उनीहरु विगत दुई वर्षदेखि बाँकेको कोहलपुरमा जुसको व्यापार गरिरहेका छन् । दाजुभाईले उखुको जुस बेचेरै परिवार धानेको बताउँछन् । ‘कम मेहनतमै हजारौं कमाइ हुन्छ’–लक्की खान भन्छन् । गर्मीको सिजनमा उखुको जुस बेचे पनि अन्य समयमा भने विभिन्न स्थानमा लाग्ने मेला महोत्सवमा अरु व्यवसाय सञ्चालन गर्ने गरेको उनी बताउँछन् । 

गर्मीको समयमा जुस बेच्दा व्यापारीको व्यापार बढेको छ भने सर्वसाधारणलाई जुस पिउन पाउँदा शितलता मिलेको छ । यतिबेला कोहलपुरमा मात्र नभई नेपालगन्ज र आसपासका सडक छेउमा पनि जुस बेच्न व्यापारीहरूलाई भ्याई नभ्याई छ । गर्मी मौसम शुरु भएसँगै उखुको जुसको व्यापार यतिखेर बढिरहेको उनीहरुको भनाईछ ।

राजुका अनुसार उखुको जुस बेचेरै महिनाको एक लाख देखि एक लाख ३० हजार सम्म कमाई हुने गरेकोछ । उखुको जुसका लागि उनीहरुले भने नेपाल कै उखु प्रयोग गर्ने गरेकाछन् । विभिन्न कामको लागि बजारतिर निस्कने मानिसहरू उखुको जुसतर्फ बढी आकर्षित हुने गरेका छन् । बिहानैदेखि व्यस्त देखिने उखु जुस ठेलाहरूमा राम्रै व्यापार हुने गरेको छ । 

अहिले बजारमा धेरै युवा व्यवसायीहरूले उखुको जुसको व्यापार गरिरहेका छन् । उखुको जुसबाट गर्मी मौसममा रामै्र कारोबार हुने गरेको छ । उखुको जुसको राम्रै व्यापार हुने भएपछि यसप्रति मौसमी व्यापार गर्नेहरुको आकर्षण बढ्दै गएकोछ ।

उखुको जुस स्वास्थ्यका लागि पनि निकै फाइदाजनक रहेको विज्ञहरूको भनाइ छ । उखुको जुसको व्यापार गरिरहेकाहरूलाई रोजगारी मिलेको छ नै यसले मनग्य आम्दानी समेत हुने गरेकोछ ।