नेपालगन्ज १८ जेठ : जिल्ला प्रहरी कार्यालय बाँकेले २१ लाखको तस्करीको सामान पक्राउ गरेकोछ । प्रहरीले नेपालगन्जका विभिन्न तीन स्थानबाट भन्सार छलि तस्करी गरि ल्याइएको सामान पक्राउ गर्न सफल भएको हो ।

नेपालगन्ज उपमहानगरपालिका वडा नम्बर–२० राँझा विमानस्थलभित्र सनराईज कुरियरमार्फत काठमाण्डौं पठाउने तयार रहेको उक्त सामान प्रहरीले नियन्त्रणमा लिएको हो । 

कुल ७२० पिस खरिद बिक्रीको बिल नभएको मोबाईलको कम्बो डिस्प्ले अन्दाजी १८ लाख बराबरको मोबाईल डिस्प्ले र नेपालगन्ज उपमहानगरपालिका वडा नम्बर ११ बाट लेडिज कुर्ता सुरवाल, लुङ्गि गरि अन्दाजी २ लाख ८७ हजार र नेपालगन्ज उपमहानगरपालिका वडा नम्बर–३ बाट ३७२ थान चप्पल अन्दाजी मुल्य ४४ हजार ६४० गरी २१ लाख ३१ हजार ६४० रुपैयाँ बराबरको सामान प्रहरीले पक्राउ गरेको हो । 

जिल्ला प्रहरी कार्यालय बाँकेका प्रहरी प्रवक्ता डिएसपी नारायण डाँगीका अनुसार नेपालगन्जका विभिन्न स्थानबाट भन्सार छलि अबैधरुपमा ल्याइएको उक्त सामान पक्राउ गरी आवश्यक कारबाहीका लागि नेपालगन्ज भन्सार कार्यालय बुझाइएकोछ । प्रहरीका अनुसार उक्त सामानका विषयमा थप अनुसन्धान भइरहकोछ ।