नेपालगन्ज १० साउनः नेपालगन्ज उद्योग वाणिज्य संघका महासचिव भिमबहादुर रानाभाटलाई स्पष्टीकरण सोधिएको छ । संघका अध्यक्ष टंकबहादुर धामीले रानाभाटलाई स्पष्टीकरण सोधेका हुन् ।

रानाभाटले जानी जानी कार्यसमितिको बैठकमा अनुपस्थित रही संघको कार्यमा असहयोग गरेको र बैठकको जानकारी पत्र समेत बुझ्न इन्कार गरी विधान विपरितको पदीय मर्यादामा नरही विधान प्रतिकूल कार्य गरेको ठहर गरिएको छ । 

अध्यक्ष धामीले बुधबार सोधेको स्पष्टीकरणमा रानाभाटबाट लिखित रुपमा विधानको दफा २९(ठ) बमोजिम लिखित स्पष्टीकरण मागेका छन् ।

उल्लेखित विषयहरुका सम्बन्धमा पत्र प्राप्त भएको मितिले ३ दिनभित्र आफै उपस्थित भई लिखित स्पष्टीकरण पेश गर्न अनुरोध गरिएको छ । उक्त अवधिभित्र लिखित स्पष्टीकरण पेश नगरेमा वा पेश गरेको स्पष्टीकरण र प्रमाणहरु सन्तोषजनक नदेखिएमा विधान बमोजिम कारबाही भै जाने चेतावनी दिइएको छ ।