कोहलपुर १२ साउन : बाँकेको कोहलपुरमा अवस्थित नेपालगन्ज मेडिकल कलेजबाट ३ हजार बढी डाक्टर उत्पादन भएका छन् । 

लर्डबुद्ध एजुकेशनल एकेडेमी लिमिटेड अन्तर्गतको नेपालगन्ज मेडिकल कलेजबाट पछिल्लो २६ वर्षमा ३ हजार बढी डाक्टर उत्पादन गर्न सफल भएको हो । 

२०५४ सालबाट कलेजले एमबिबिएस पढाई सुरु गरेको थियो । बाँकेको बैजनाथ गाउँपालिका वडा नम्बर–१, चिसापानीमा कलेजको संरचना रहेको छ । 

स्थापनाकालदेखी हालसम्म कलेजबाट ३ हजार २ सय ४२ जना बिद्यार्थी एमबिबिएस उर्तीण भईसकेका छन् । जसमा नेपालसहित भारत र श्रीलंकाका बिद्यार्थी रहेका छन् । 

यस्तै सन् २०१२ बाट कलेजमा सुरु भएको (एमडी÷एम.एस) अध्यापनबाट ३ सय ४४ जना बिद्यार्थी उर्तीण भएको नेपालगन्ज मेडिकल कलेज, शिक्षण अस्पताल कोहलपुरका निर्देशक एवम् प्राध्यापक डाक्टर रेशमबहादुर रानाले जानकारी दिए । 

उनका अनुसार कलेजबाट बिद्यार्थीले फिजिसियन, सर्जन, हाडजोर्नी, नाक, कान, आँखा सम्बन्धी रोग लगायत विभिन्न विषयमा एमडी÷एम.एस. उर्तीण गरेका छन् । 

‘एमडी-एम.एस पास गरेर यस क्षेत्रमा धेरै जनशक्ती उत्पादन भएका छन्,’ प्रा.डा. रानाले भने । 

यसैगरी कलेजबाट ५२ जना बिद्यार्थीले बि.एस्सी नर्सिङ विषय उर्तीण गरिसकेका छन् । मेडिकल कलेजद्धारा सञ्चालित शिक्षण अस्पताल कोहलपुरमा हाल १३ वटा विभाग र करिव ५ वटा विशिष्टकृत सेवा सञ्चालनमा रहेका छन् ।