नेपालगन्ज १९ साउनः बाँकेको खजुरा गाउँपालिकाले चालु आर्थिक वर्ष २०८१-८२ को विकास बजेट कार्यान्वयन सुरु गरेको छ । गाउँपालिकाका इन्जिनियर सोनु साहले साउन १ गतेदेखि नै विकास आयोजना कार्यान्वयनमा ल्याउन प्रक्रिया सुरु गरेको जानकारी दिए ।

इन्जिनियर साहले भने,‘साउन १ गते जिल्ला दररेट प्राप्त भएपछि योजनाको लागत स्टिमेट र फिल्ड नापजाँचको काम गरिरहेका छौँ ।’ पालिकाले चालु आर्थिक वर्षमा विनियोजन भएका योजनामध्ये केही योजनाको टेण्डरसमेत आह्वान गरिसकेको छ । 

यसैगरी उपभोक्ता समिति र टोल विकास समितिमार्फत सञ्चालन हुने आयोजनाको कामसमेत दशैँअगावै सम्झौता गरी कार्यान्वयन गरिसक्ने लक्ष्य गाउँपालिकाको छ । दशैँसम्म सम्पूर्ण योजनाको ठेक्का आह्वान गरी सम्झौता गरिसक्ने तयारीका साथ सम्पूर्ण जनशक्ति परिचालन भएको गाउँपालिकाका अध्यक्ष डम्बरबहादुर विकले जानकारी दिए । 

अघिल्ला आवमा ढिलो गरी काम सुरु भएका कारण विकास बजेट न्यून मात्रामा खर्च हुन थालेपछि गाउँपालिकाले यस वर्ष साउन सुरुवातदेखि नै योजना कार्यान्वयनका लागि प्रक्रिया सुरु गरेको हो । खजुरा गाउँपालिकामा गत वर्ष विकास बजेट ६९ प्रतिशत मात्रै खर्च भएको हो । 

अध्यक्ष विकले भने, ‘अघिल्लो आवभन्दा विकास बजेट बढी खर्च भए पनि यसलाई थप वृद्धि गराउन अहिलेदेखि तयारी थालिएको हो ।’ वडागत र पालिकास्तरीय तथा अन्य गरी वार्षिक करिब चार सय वटा योजनाका लागि रकम विनियोजन हुने गरेको छ । 

सङ्घ सरकार र प्रदेश सरकारबाट आउने अनुदानका योजना भदौभित्र यकिन भएपछि छिटोभन्दा छिटो कार्यान्वयनमा लैजाने पालिकाले जनाएको छ । वडामा सञ्चालित हुने योजनामा उपभोक्ता समिति र ठेक्कामार्फत हुने कामको वडा कार्यालयले समयमै समन्वय र सहकार्य गरेमा साना योजना पुस महिनाभित्र सम्पन्न भइसक्ने छन् ।