नेपालगन्ज २ भदौ : नेपाली बजारमा आज (आइतबार) सुनको मूल्यले पुनः नयाँ रेकर्ड कायम गर्न सफल भएको छ।  लगातार बढिरहेको सुनको मूल्य आज हालसम्मकै उच्च विन्दुमा पुगेको हो । 

नेपालीहरुको चाडबाड नजिकिदैँ जाँदा सुन र चाँदीको मूल्यमा बृद्धि हुँदै गएको छ ।

नेपाल सुनचाँदी व्यवसायी महासंघका अनुसार आईतबार (आज) छापावाल सुन एक लाख ५२ हजार ६०० रुपैयाँमा कारोबार भइरहेको छ । 

यसअघि गत साउन २९ गते नयाँ रेकर्ड बनाएको थियो । उक्त दिन सुनको मूल्य तोलामा एक लाख ५० हजार ८०० रुपैयाँमा कारोबार भएको थियो ।

गत शुक्रबार एक लाख ४९ हजार ६०० रुपैयाँमा कारोबार भएको थियो । शुक्रबारको तुलनामा आज तीन हजार रुपैयाँले मूल्य बढेको छ ।

आज चाँदी एक हजार ७६० रुपैयाँमा कारोबार भएको महासंघले जनाएको छ । गत शुक्रबार एक हजार ७४० रुपैयाँमा कारोबार भएको थियो ।  

शुक्रबारको तुलनामा भने आईतबार सुनको भाउ प्रतितोला तीन हजार रूपैयाँ बढेको हो । आईतबार चाँदीको मूल्य पनि अघिल्लो दिनको तुलनामा बढेको छ ।

आज अन्तर्राष्ट्रिय बजारमा भने सुन प्रतिऔंस २५ सय ०९ अमेरिकी डलरमा कारोबार भइरहेको छ ।