नेपालगन्ज २५ भदौ : व्यक्ति हत्या आरोपित लुम्बिनी प्रदेशका वन तथा वातावरण मन्त्री बादशाह कुर्मीले पदबाट राजीनामा दिएका छन् । 

मंगलबार बेलुकी उनले मुख्यमन्त्री समक्ष राजीनामा पत्र बुझाएका हुन् । 

मुख्यमन्त्री चेतनारायण आचार्यले मन्त्री कुर्मीले पदबाट राजीनामा बुझाएको बताए । तर, सोबारे पत्र भने बुधबार मात्रै आफूसमक्ष आइपुग्ने उनले बताए । 

कुर्मी नेपाली काँग्रेसको नेतृत्व गर्दै सरकारमा सहभागी भएका थिए । उनी गत साउन ७ गते मन्त्री भएका थिए । 

हत्या आरोपितलाई मन्त्री बनाएको भन्दै विरोध हुँदै आएको छ । उनीमाथि बाँकेकी निर्मलादेवी कुर्मीको हत्या आरोप छ । आफूमाथि यो मुद्दाको आरोप लागेपछि कुर्मीले नैतिकताका आधारमा पदबाट राजीनामा दिएको उनको सचिवालयले जनाएको छ । उनी आफू निर्दोष रहेको र दोषी प्रमाणित भए जस्तोसुकै सजाय भोग्न तयार रहेको बताउँछन् ।

उनलाई तत्काल हटाउनुपर्ने माग राख्ने बाँकेका केही अभियन्ताहरू काठमाडौंको माइतीघर मण्डलामा धर्ना दिइरहेका छन् ।