नेपालगन्ज : केन्द्रीय तथ्यांक विभागले राष्ट्रिय जनगणना–२०७८ को तयारी शुरु गरिएको जनाएको छ । बुधबार राष्ट्रिय तथ्यांक परिषद्को ३३ औँ तथा राष्ट्रिय जनगणना राष्ट्रिय निर्देशक समितिको पहिलो बैठक संयुक्त रूपमा बसेको थियो । बैठकमा जनगणनाका तयारीका बारेमा छलफल शुरु भएको विभागका निर्देशक ढुण्डीराज लामिछानेले बताए ।

राष्ट्रिय योजना आयोगका उपाध्यक्ष डाक्टर पुष्पराज कँडेलको अध्यक्षतामा बैठक बसेर तथ्यगत विवरणमा राखिने सूचक र आगामी २०७८ मा हुने राष्ट्रिय जनगणना सञ्चालन तथा व्यवस्थापन निर्दे्शिका स्वीकृतिको आवश्यक प्रक्रिया अघि बढाउने निर्णय गरेको हो ।

योसँगै जनगणना–२०७८ को तयारीका लागि कानूनी आधारको शुरूआत भएको विभागले जनाएको छ । विसं १९६८ देखि शुरु भएको जनगणनाको यो १२ औँ शृखला हो । यस पटक सात प्रदेश, ७७ जिल्ला समन्वय समिति र ७ सय ५३ स्थानीय तहमा छलफल गरी त्यहाँबाट आएका विचारलाई समेट्ने विभागको तयारी रहेको छ ।