खजुरा (बाँके) : बाँकेको खजुरा गाउँपालिकाका विभिन्न क्वारेन्टिनबाट समय अवधि पुगेर आरडिटी र पिसिआर जाँचपछि रिपोर्ट नेगेटिभ आएका ५ सय एक जना घर फर्किएका छन् ।

गाउँपालिकाका स्वास्थ्य शाखा प्रमुख पूर्ण खड्काका अनुसार २ सय ७१ जनाको आरडिटी र ५ सय १० जनाको पिसिआर जाँछ गरिएको छ । बिहीबार र शुक्रबार जाँच गरिएका आरडिटिमा १८ जनाको पोजेटिभ देखिएपछि पीसिआर गरिने खड्काले बताए ।

क्वारेन्टिनमा रहेका र अन्यको समेत गरिएको पीसिआर जाँचमा ५ जनाको कोरोना पोजेटिभ देखिएको थियोे । स्वास्थ्य प्रमुख खड्काका अनुसार जेठ २१ र २२ गते संकलन गरिएको रिपोर्ट आएको छैन । खजुरामा जाँचलाइ तीव्रता दिइएको छ ।

आज शुक्रबार मात्र १ सय ४ जना घर फर्किएका छन् । हालसम्म १ हजार २ सय ४६ जना क्वारेन्टिनमा रहेको गाउँपालिकाले जनाएको छ । गाउँपालिकामा २५ क्वारेन्टिन निर्माण गरिएकोमा २४ वटामा मानिस बस्दै आएका छन् ।