बर्दिया ९ चैत : गैंडाको यकिन तथ्यांक थाहा पाउन आगामी चैत १७ गतेदेखि बर्दिया राष्ट्रिय निकुञ्जमा गणना शुरु गरिदैं छ । तोकिएको समयभन्दा करिब दुई वर्षपछि विश्वकै दुर्लभ मानिने एक सिङे गैँडाको गणना आजदेखिसुरु भएपनि बर्दिया राष्ट्रिय निकुञ्जमा आगामी चैत १७ गतेबाट गैडा गणना गरिदैछ ।

आजबाट शुरु भएको गैंडा गणनाको सबै तयारी पूरा भएको चितवन राष्ट्रिय निकुञ्जले जनाएको छ । चितवन र पर्सा राष्ट्रिय निकुञ्जका गैंडाको आज एकैसाथ गणना शुुरु गरिँदै छ ।

वन तथा भूसंरक्षणमन्त्री प्रेम आलेमगरले पर्सा राष्ट्रिय निकुञ्जको प्रतापपुरमा वनदेवीको पूजा गरी गैँडा गणनाको सुरुआत गर्ने कार्यक्रम रहेको चितवन राष्ट्रिय निकुञ्जका प्रमुख अणनाथ बरालले जानकारी दिए । गैँडा गणना राष्ट्रिय निकुञ्ज तथा वन्यजन्तु संरक्षण विभागको नेतृत्वमा हुन लागेको हो ।

चितवन र पर्सालाई एउटा ब्लक बनाइएको छ । यी दुई निकुञ्जमा आजदेखि तथा बर्दिया राष्ट्रिय निकुञ्जमा चैत १७ गतेदेखि र शुक्लाफाँटामा चैत्र १९ गतेदेखि गणना सुरु हुँदैछ ।

दुई निकुञ्जमा गैँडा गणना गर्न कम्तीमा २० दिन लाग्ने अनुमान छ । चैत २९ गतेसम्ममा चारवटै निकुञ्जमा गैँडा गणना सकेर वैशाख पहिलो साता नतिजा सार्वजनिक गर्ने गरी तयारी गरिएको छ ।

पाँच–पाँच वर्षमा गैँडा गणना गर्ने भनिए पनि अघिल्लो वर्ष कोरोना भाइरस (कोभिड–१९) र त्यसअघि बजेट अभावका कारण गैँडा गणनाको काम रोकिएको थियो ।

यसैबीच बर्दियामा आगामी चैत १७ गतेबाट गैंडा गणना गर्ने गरी तयारी भैरहेको बर्दिया राष्ट्रिय निकुञ्जका सहायक संरक्षण अधिकृत अशिम कुमार थापाले बताए ।

चैत १७ गते गैंडा गणनाका लागि छनोट भएका कर्मचारीलाई तालिम दिइने र त्यहि दिनदेखि नै गैंडा गणनाका लागि फिल्डमा जाने उनले बताए । बर्दिया राष्ट्रिय निकुञ्जका १० वटा र एनटीएनसीको एउटा गरी ११ वटा हात्ती तयारी अवस्थामा रहेको उनले बताए ।

बर्दिया राष्ट्रिय निकुञ्जको गैडा पाइने ५ वटा ब्लकमा गैंडा गणना गरिने छ । बबई भ्याली, गैंडा मचान ब्लक, हेडक्वाटर ब्लक, डल्ला र हात्ती मचान ब्लकमा गैंडा गणना गरिने छ ।

यसअघि २०१९ मा बर्दियामा गैंडा गणना गरिएको थियो । अहिले बर्दियामा ३७ वटा गैंडा रहेको तथ्यांक छ । यस वर्ष गैंडाको संख्या बढ्ने अनुमान गरिएको छ ।
चितवन र पर्सा राष्ट्रिय निकुञ्जमा भने भोलि (सोमबार) बाटै गणना सुरु गरिने जनाइएको छ ।

बर्दिया राष्ट्रिय निकुञ्जका प्रमुख संरक्षण अधिकृत विष्णु प्रसाद श्रेठका अनुसार गणनामा खटिने कर्मचारी, हात्ती छनोटसँगै उनीहरूको बासस्थानको व्यवस्थापन लगायतका तयारी भइरहेको छ । नेपालमा सन् २०१५ मा भएको पछिल्लो गणनामा ६ सय ४५ गैंडा रहेको पाइएको थियो ।