बाँके(नरैनापुर) २९ साउन : बाँकेको नरैनापुरस्थित प्रशिद्ध धार्मिक तिर्थस्थल सन्तानेश्वर मन्दिर क्षेत्रको सरसफाई गरिएको छ ।

नमुना युवा क्लब नरैनापुरको अगुवाईमा मन्दिर क्षेत्रको सरसफाई गरिएको हो । क्लबमा आवद्ध युवा युवतीसहित ४० जनाको समुहले सरसफाई गरेको थियो ।

सन्तानेश्वरको प्रवेशद्धारदेखी मन्दिर परिसर सम्मको क्षेत्रमा सरसफाई गरिएको क्लबको अगुवाई गरेका स्थानीय युवा अरुण यादवले जानकारी दिएका छन् । सरसफाईका लागि उनले ब्यवस्थापन र समन्वयको जिम्मेवारी सम्हालेका थिए ।

बाँकेको नरैनापुरमा रहेको उक्त मन्दिर दर्शन गर्न जाने धार्मिक पर्यटकको संख्या पछिल्लो समयमा एक्कासी बढेको छ ।

नेपालगन्जबाट पुर्वी–दक्षिणमा पर्ने उक्त मन्दिर पहाडको चुचुरोमा अवस्थित छ । मन्दिर दर्शन गर्न जाने पर्यटकले प्लाष्टिक जन्य फोहोर फ्याक्दा मन्दिर क्षेत्र दुर्गन्धित बन्न पुगेको थियो ।

यादवले भने, ‘प्रवेशद्धारदेखी पहाडको चुचुरोमा मन्दिर परिसरसम्म सरसफाई गरेका छौं ।’ उक्त मन्दिर दर्शन गर्नका लागि अचेल दैनिक सयौंको संख्यामा धार्मिक पर्यटक पुग्ने गर्छन् ।

धार्मिक पर्यटकको संख्या बढ्न थालेपछि नरैनापुर गाउँपालिकाले त्यस क्षेत्रलाई प्राथमिकतामा राखेको छ । गोरेटो बाटो र अग्लो पहाड भएका कारण धार्मिक पर्यटकहरु मन्दिरसम्म सहज रुपमा पुग्न कठिनाई छ ।

सन्तानेश्वर मन्दिर दर्शन गर्न पुग्ने धार्मिक पर्यटकका लागि गाउँपालिकाले यही साउन २ गते स्वागत कार्यक्रम समेत राखेको थियो ।

उक्त दिन पाँच हजार भन्दाबढी धार्मिक पर्यटक पुगेको गाउँपालिकाले जनाएको छ । सन्तानेश्वर महादेव मन्दिरको प्रचार प्रसार र महत्व बढ्दै गएकाले पछिल्लो समयमा धार्मिक पर्यटकको संख्या बढ्दै गएको गाउँपालिकाका प्रमुख प्रशासकीय अधिकृत दलबहादुर बस्नेतले बताउँछन् ।

उनी भन्छन्, ‘मन्दिरको महत्वबारे प्रचार प्रसार भइरहेको छ, जसले गर्दा धार्मिक पर्यटकहरु बढ्दै गएका छन् ।’