मध्यपुरथिमि ३१ साउन : भक्तपुरको नगरकोट, तेलकोट र छालिङलगायतका क्षेत्रमा बँदेलले मकै नष्ट गरिदिएपछि किसान समस्यामा परेका छन् । ती क्षेत्रका सयौँ रोपनी जग्गामा लगाइएको बालीलाई जंगली बँदेलले नष्ट गरिदिने गरेको उनीहरुको गुनासोे छ ।

हरेक वर्ष बँदेलले मकै, कोदो, आलुलगायत बाली नोक्सान गरेको छालिङका श्याम पुरीले बताए । रात परेपछि बँदेलको समूह नै मकै बारीमा पसेर मकै खाने र नष्ट गरिदिने गरेको उनले बताए । जिल्ला वन कार्यालय तथा नगरपालिकालाई पटक–पटक नियन्त्रण गर्न आग्रह गरिएकामा हालसम्म सम्बोधन नभएको उनीहरूको गुनासो छ ।

चाँगुनारायणका बद्री अधिकारीले जंगलबाट राति आउने बँदेलको झुण्डले आलु, कोदो मकै खाइदिने गरेको र थाल ठटाएर भगाउने गरे पनि दुःख दिन नछाडेको बताए ।

नगरकोटका सन्त लामा भन्छन्,‘मकै खान बँदेल राति आउँछ । बँदेलको झुन्ड एकैपटक मकै बारीमा छिरेर मकै खाने र नष्ट गर्छ । राति थाल बजाएर धपाउनुपर्छ, डर हुन्छ । बँदेलले बाली नष्ट गरेको क्षतिपूर्ति पाउनुपर्ने यहाँका किसानको माग छ ।’ -रासस