नेपालगन्ज: अख्तियारले पछिल्ला दिन बाँकेका सरकारी कार्यालयमा निगरानी बढाएको छ । निगरानी बढाएसगैं सरकारी कार्यालयभित्र हुने आर्थिक चलखेल नियन्त्रणमा समेतका अख्तियार सक्रिय भएकोछ ।

यस्तै अख्तियार दुरुपयोग अनुसन्धान आयोग सम्पर्क कार्यालय नेपालगन्जले शनिबार घुस सहित एकजनालाई पक्राउ गरेकोछ ।

उच्च अदालत तुलसीपुर नेपालगन्ज ईजलासमा कार्यरत टाइपिष्ट नायब सुब्बा कुमार पाठकलाई नगद तीन लाख घुस रकम सहित अख्तियारले आफ्नो नियन्त्रणमा लिएको हो ।

शनिबार बेलुका पाठकलाई नेपालगन्जस्थित चारबाहिनी चोक नजिकै रहेको श्री लयर्स चेम्बरबाट पाठकलाई नियन्त्रणमा लिइएको हो । पाठकले अदालतमा विचारधीन मुद्दामा सहजिकरण गरिदिने बहानामा सेवाग्राहीसँग घुस मागेका थिए ।

अख्तियार दुरुपयोग अनुसन्धान आयोग सम्पर्क कार्यालय नेपालगन्जका प्रमुख गणेश गैरेका अनुसार शनिबार साँझ घुस लिँदै गरेको सूचना पाएपछि अख्तियारको टोली परिचालन गरिएको थियो ।

पक्राउ परेका नायब सुब्बा पाठकले सेवाग्राहीसंग तीन लाख रुपैयाँ घुस माग गरेको अख्तियारले जनाएको छ । प्रमुख गैरेले भने–‘घुस लेनदेन गरिरहेको अवस्थामा नेपालगन्जस्थित चारबाहिनी चोक नजिकै रहेको श्री लयर्स चेम्बरबाट पाठकलाई नियन्त्रणमा लिइएको हो ।