डुडुवा (बाँके) १२ असोज : सूचनामा विश्वव्यापी पहुँच अन्र्तराष्ट्रिय दिवस नेपालगन्जमा एक कार्यक्रमका बीच मनाइएको छ । सूचनामा सबैको पहुँच तथा थाहा पाउने अधिकार अन्र्तगत दिवसको सम्झनामा सूचनाको हकलाई कार्यन्वयनमा जोड दिइएको हो ।

दिवसको अवसरमा नेपालगन्जको निम्बल क्लेजका युवा विद्यार्थीहरुलाई सूचनाको हक सम्वन्धी एक दिने अभिमुखीकरण गरिएको छ ।

पारस्परिक जवाफदेहिता परियोजना अन्र्तगत सूचना र मानव अधिकार अनुसन्धान केन्द्र नेपालगन्जले सूचनाको हकका बारेमा सबैले थाहा पाउने भनेर अभिमुखीकरण गरेको हो । अभिमुखीकरणमा करिव ४७ जना विद्यार्थीहरुको सहभागिता रहेको थियो ।

कार्यक्रममा सूचना अभियन्ता अधिवक्ता विश्वजित तिवारीले सूचनाको हक, यस सम्वन्धीको कानूनी व्यवस्था, र कार्यन्वयनको अवस्था लगायतका बारेमा जानकारी गराएका थिए । अभिमुखीकरणमा निम्बल कलेजका सञ्चालक सुनिलकुमार गुप्ता, प्रिन्सिपल शतिस थापा, संस्थाका उपाध्यक्ष कृष्णमुरारी प्रसाद भट्ट, कार्यक्रम संयोजक टेकनाथ आचार्य, सूचना अभियन्ता शैलेन्द्रकुमार वैश्य लगायतले बोलेका थिए ।

संस्थाले सूचनाको हक सम्बन्धी ऐन २०६४ लाई कार्यान्वयन गर्न सरोकारवालासँग पहल गर्दै आएको छ । बाँके जिल्लामा अझै पनि ऐन पूर्ण रुपमा कार्यन्वयन भएको पाईदैन । सूचनाको हक सम्बन्धी प्रचार–प्रसार तथा दवाब अभियान सञ्चालन भएपछि सार्वजनिक निकायले सूचना अधिकारी तोक्ने, सूचनाको हकका बारेमा निवेदन दर्ता गर्ने र सूचना उपलब्ध गराउन थालेको सूचनाको हक जिल्ला अनुगमन समितिले जनाएको छ ।