नेपालगन्ज २५ कार्तिकः तालाबन्दीका कारण नेपाली काँग्रेसको १४ औं महाधिवेशनका लागि बाँकेमा यसअघि तय गरिएको कांग्रेसको निर्वाचन कार्यक्रम सबै पछाडी धकेलिन पुगेको छ ।

जिल्ला निर्वाचन परिचालन समितिले यसअघि तोकेको कार्तिक २७ गते वडा, कात्तिक ३० गते गाउँपालिका÷नगरपालिका, मंसिर ३ गते प्रदेश सभा, मंसिर ६ गते क्षेत्र र मंसिर १० गते जिल्लाको निर्वाचन अब नहुने भएको हो ।

तालाबन्दीका कारण यि सबै कार्यक्रम एकदिन पछाडी धकेलिन पुगेको हो । निर्वाचन अधिकृत एवम् वरिष्ठ अधिवक्ता रेवती रमण भट्टराईले निर्वाचन कार्यक्रम एकदिन पछाडी धकेलिएको जानकारी दिए ।

उनले अब कार्तिक २८ गते वडा, मंसिर १ गते गाउँपालिका÷नगरपालिका, मंसिर ४ गते प्रदेश सभा, मंसिर ७ गते क्षेत्र र मंसिर ११ गते जिल्लाको निर्वाचन हुने बताए । क्रियाशिल सदस्यताका विषयमा विवाद उत्पन्न हुँदा असन्तुष्ट पक्षले निर्वाचन परिचालन समितिको सचिवालयमा बुधबार ताला लगाएको थियो ।

उक्त पक्षले २ सय ३९ जनाको क्रियाशिल सदस्यता आउन लागेको भन्ने हल्लै हल्लामा निर्वाचन परिचालन समितिको सचिवालय जस्तो संवेदनशिल कार्यालयमा ताला लगाएको थियो । उक्त पक्षले ‘थप भएका भनिएका नयाँ सदस्यको अब नआउने भन्ने आश्वासनकै आधारमा ताला खोलेको थियो ।

नयाँ आउन लागेको भनिएको सदस्यको लिष्ट आधिकारिक रुपमा निर्वाचन समितिको कार्यालयमा नआउँदै हल्लाको पछाडी लागेर पार्टीका जिम्मेवार नेताले नै ताला लगाएपछि तल्लो तहमा रहेका कार्यकर्ताबाट तिब्र रुपमा आक्रोश बढेको थियो । एकातिर कार्यकर्ताको आक्रोश र अर्कोतिर केन्द्रबाट पाएको आश्वासनको भरमा असन्तुष्ट पक्षले आफैले लगाएको ताला खोलेको थियो ।

तालाबन्दी खुलेपनि निर्वाचन कार्यक्रम भने प्रभावित भइसकेका छन् । निर्वाचन परिचालन समितिले यसअघि बिहीबारका लागि तय गरेको मतदान अधिकृत र सहायक मतदान अधिकृतका लागि अभिमुखिकरण कार्यक्रम शुक्रबार नेपालगन्जका लागि सरेको छ । त्यसैगरी शुक्रबारका लागि तय गरिएको उम्मेदवार मनोनयन कार्यक्रम शनिबार गरिने भएको छ । यस्तै कात्तिक २७ गते गर्ने भनिएको वडाको निर्वाचन आईतबार हुने भएको छ ।

तालाबन्दी खुलेपछि जिल्ला निर्वाचन परिचालन समितिका पदाधिकारीले बिहीबार बेलुका अबेरसम्म निर्वाचन कार्यक्रमको तयारी गरेको समितिका सदस्य एवम् डिएलए बाँकेका अध्यक्ष ज्ञवालीले जानकारी दिए ।

जिल्ला निर्वाचन परिचालन समितिका संयोजक एवम निर्वाचन अधिकृत भट्टराईको नेतृत्वमा सहायक निर्वाचन अधिकृत अधिवक्ता चित्रबहादुर शाही, निर्वाचन परिचालन समितिका सदस्य एवम् डिएलए बाँकेका अध्यक्ष इश्वरीप्रसाद ज्ञवाली, समितिका सदस्य एवम् शिक्षक संघ बाँकेका अध्यक्ष यादव, समितिका सदस्य(प्रवक्ता)एवम् नेपाल प्रेस युनियन बाँकेका अध्यक्ष अर्जुन ओली, प्रजातान्त्रिक प्राध्यापक संघ बाँकेका अध्यक्ष अशोक बस्नेत लगायत ब्यक्तिहरु निर्वाचन सम्बन्धी काममा अबेरसम्म खटिएका हुन् ।