नेपालगन्ज १० मंसिर : नेपाली काँग्रेसको १४ औं महाधिवेशन अन्र्तगत बाँकेको क्षेत्र नम्बर ३ मा भएको निर्वाचनबाट बादशाह कुर्मी काँग्रेस महाधिवेशन प्रतिनिधीमा अत्यधिक मतले विजयी भएकाछन् ।

मतदान अधिकृत विरेन्द्र यादवका अनुसार महाधिवेशन प्रतिनिधी(खुल्ला)तर्फ भएको मतदानमा बादशाहले कुल ३४६ मत प्राप्त गर्दै निर्वाचित भए । कुल ४४६ मतदाता रहेको बाँके क्षेत्र नम्बर–३ मा मतदान हुँदा बादशाहले सबैभन्दा बढि ३४६ मत प्राप्त गरे ।

यसैबीच, महाधिवेशन प्रतिनिधीमा चुनिए संगै कुर्मीले नेपाली काँग्रेस बाँकेको सभापतिमा उम्मेदवारी घोषणा गर्ने भएकाछन् । देउवा प्यानलका नेताका रुपमा परिचित बादशाहले आज(शुक्रबार) दिउँसो साढे एक बजे नेपालगन्जको विपी चोकमा रहेको सुनाखरी रेष्टूँरेण्टमा बाँके काँग्रेस पार्टी सभापतिमा उम्मेदवारी दिने बताएका हुन् ।

सेतोखरीसंग कुरा गर्दै काँग्रेस बाँकेका प्रभावशाली नेता बादशाहले काँग्रेस बाँकेको नेतृत्वका लागि आफ्नो उम्मेदवारी घोषणा गर्ने बताए । यसका लागि जिल्लाका सम्पूर्ण सञ्चारकर्मीलाई उपस्थितीको लागि समेत उनले आग्रह गरे ।

यस्तै नेपाली काँग्रेसको १४ औं महाधिवेशन अन्तर्गत बाँके क्षेत्र नम्बर ३ मा भएको मतदानको मत परिणाम सार्वजनिक भएको छ । निर्विरोध हुन नसकेका पदका लागि बिहीबार भएको मतदान पश्चात रातभर चलेको मत गणना परिणाम शुक्रबार(आज) बिहान सार्वजनिक भएको हो ।

मतदान अधिकृत विरेन्द्र यादवले दिएको जानकारी अनुसार क्षेत्र नम्बर ३ को सचिवमा ज्ञानबहादुर ओली र दिपबहादुर थापा निर्वाचित भएका छन् । ओलीले २६५ र थापाले २१७ मत ल्याएका हुन् । उनका निकटतम प्रतिद्वन्द्वी कोमलराज सिंह ठकुरीले १०३ र विशाल बहादुर कर्माचार्यले ९८ मत प्राप्त गरे ।

सह–सचिवमा निर्वाचित भएका डम्बरबहादुर रावतले १९८ र राकेशकुमार सोनीले १९४ मत ल्याए । उनका निकटतम प्रतिद्वन्द्वी दिपककुमार थारुले १०१, प्रेमबहादुर शाहीले ९०, पदमबहादुर मल्लले ८० र सुदिप सेढाईले ७१ मत प्राप्त गरेका छन् ।

महाधिवेशन प्रतिनिधी(खुल्ला)तर्फ नेता बादशाह कुर्मीसहित कपिलदेव शर्मा, कृष्णबहादुर बिक रसाईली, टेकबहादुर खड्का, देवबहादुर खत्री, प्रकाशबहादुर शाही, भावना चौधरी, मेघराज ओली, रामेश्वर कँडेल र लक्ष्मीनारायण शाह निर्वाचित भएको यादवले बताए ।

महाधिवेशन प्रतिनिधी(महिला)मा उमाकुमारी थापा, कमला हमाल, निनुमाया कुँवर र झुपकली मगर निर्वाचित भएका छन् । यस्तै दुखिराम लोनिया (मधेसी), जगदिश प्रसाद हरिजन(दलित), चन्तराम थारु(थारु) पनि महाधिवेशन प्रतिनिधीमा निर्वाचित भएका छन् ।

यस्तै क्षेत्रीय कार्यसमिति सदस्य(खुल्ला)तर्फ रामप्यारी यादव, जयाराम कुर्मी, तारामणि अधिकारी, राजन वर्मा, इसरात अहमद खाँ, कृष्णबहादुर चौधरी तथा दिलकुमारी पौडेल(अपांगता) र शिवकुमार कोरी(दलित) मा निर्वाचित भएका छन् ।

क्षेत्रीय कार्यसमिति सदस्य प्रदेश ३ (क)बाट हरिदेवी रावत पनि निर्वाचित भईन् । क्षेत्रीय सदस्य(खस आर्य)मा दुई जनाले बराबर ९१÷९१ मत ल्याएपछि गोला प्रथाबाट झलक शर्मा निर्वाचित भएको मतदान अधिकृत यादवले जानकारी दिएका छन् ।

यसअघि बुधबार भने क्षेत्रीय सभापतिमा नक्की खाँ निर्विरोध निर्वाचित भएका थिए । खाँसहित समानुपातिक तर्फबाट क्षेत्रीय कार्यसमिति, महाधिवेशन प्रतिनिधी र प्रदेश ३ (ख) कार्यसमिति निर्विरोध निर्वाचित भएका थिए ।