नेपालगन्ज ११ मंसिरः नेपाली काँग्रेसको १४ औं महाधिवेशन अन्तर्गत बाँके क्षेत्र नम्बर– २ को सभापतिमा पुनः रमेशकुमार गुप्ता निर्वाचित भएका छन् ।

नेपालगन्जको भेरी प्राविधिक शिक्षालयमा सम्पन्न सभापति सहित पदाधिकारीको मत गणनामा सभापति पदमा गुप्ता दोस्रो कार्यकालका लागि निर्वाचित भएका हुन् । गुप्ताले कुल २३९ मत प्राप्त गर्दै निकटतम प्रतिद्वन्द्वी बिरेन्द्र शाहलाई हराए ।

सभापतिमा निर्वाचित भएका गुप्ताले शाहलाई ४८ मतको मतान्तरमा हराए । निकटतम प्रतिद्वन्द्वी शाहले कुल १९१ मत प्राप्त गरे ।

यस्तै सचिवमा सुनिलसिंह हमालले २६३, प्रदीप साहु तेलीले २५०, आशिष वर्माले १६७ र बुद्धिसागर सुवेदीले १३१ मत ल्याएका छन् । यस्तै तरुण बज्राचार्यले २७१, सब्बिर खाले २१८, रमेशकुमार तिमिल्सिनाले १७१ र ओम प्रकाश चौहानले १४२ मत ल्याएको सहायक मतदान अधिकृत प्रभाकर भट्टराईले जानकारी दिए । सभापति सहित सचिव र सहसचिवमा गुप्ताको प्यानल निर्वाचित भएको छ ।

उक्त क्षेत्रमा रहेका कुल ४ सय ५१ जना मतदाता मध्ये ४ सय ४० मत खसेको थियो । गुप्ता र शाह दुबै संस्थापन पक्षका हुन् । तर, शाहलाई संस्थापन इतर (कोइराला÷पौडेल) पक्षको समर्थन रहेको थियोे । गुप्तालाई भने संस्थापन पक्ष(देउवा)ले आफ्नो आधिकारिक उम्मेदवारको रुपमा अगाडी सारेको थियोे ।