नेपालगन्ज १० माघः कोरोना भाइरस संक्रमण तीव्ररुपमा फैलिरहेका बेला राष्ट्रिय सभा निर्वाचनको मौन अवधि शुरु भएकोछ । माघ १२ गते बुधबार हुने राष्ट्रिय सभा सदस्य निर्वाचनको मौन अवधि गएराति १२ बजेदेखि शुरु भएको हो ।

मौन अवधि शुरु भइसकेकोले आचारसहिता पालना गर्दै निर्वाचन प्रचारप्रसार गर्न र मत माग्न नपाउने आयोगले जनाएकोछ । आयोगका अनुसार मौन अवधिको समयमा निर्वाचन प्रचारप्रसार गर्न र मत माग्न हुँदैन ।

उमेदवार र राजनीतिक दलहरूको प्रचारप्रसार हुने गरी कुनै समाचार वा सूचना प्रकाशन वा प्रसारण गर्न पनि रोक लगाइएको छ ।

आयोगले निर्वाचनमा भाग लिने मतदाताहरूलाई मतदाता सूचीमा आफ्नो नाम भए÷नभएको यकिन गर्न पनि अनुरोध गरेको छ । जसका लागि आयोगबाट जारी भएको मतदाता परिचयपत्र वा नेपाली नागरिकताको प्रमाणपत्र वा राष्ट्रिय परिचयपत्रका आधारमा निर्वाचनमण्डलको अन्तिम मतदाता नामावली विवरणसँग ‘क्रस भेरिफाइ’ गर्न अनुरोध गरिएको छ ।