नेपालगन्ज २० माघ : राष्ट्रिय प्रजातन्त्र पार्टी (राप्रपा) का नेता मोहनसिंह केसीको निधन भएको छ ।

नेपालगन्ज उपमहानगरपालिका वडा नम्बर–७ निवासी ७८ वर्षीय केसीको उपचारका क्रममा बिहीबार बिहान निधन भएको हो । स्वास्थ्यमा समस्या देखिएपछि उनलाई नेपालगन्ज मेडिकल कलेज शिक्षण अस्पताल नेपालगन्जमा भर्ना गरिएको थियो ।

परिवारका अनुसार राप्रपा नेता केसीलाई लामो समयदेखी मधुमेह, रक्तचाप, मृगौला लगायत समस्या देखा परेको थियो ।

केसीले राप्रपा बाँकेको अध्यक्ष तथा केन्द्रीय सदस्य भएर काम गरेका थिए । उनको पार्थिव शरीरमा राप्रपा महामन्त्री डा. धवलसम्शेर राणा, सहायक महामन्त्री ऋषिराज देवकोटा, जिल्ला अध्यक्ष नरेन्द्र पौडेल लगायतले पार्टीको झण्डा ओढाउँदै अन्तिम श्रद्धाञ्जली दिए ।

केसीको निधनप्रति दुःख ब्यक्त गर्दै राप्रपा लगायत विभिन्न दलका नेता, कार्यकर्ता, आफन्त, शुभेच्छुक लगायतले श्रद्धाञ्जली ब्यक्त गरेका छन् । राप्रपा महामन्त्री राणा, सहायक महामन्त्री देवकोटा र जिल्ला अध्यक्ष पौडेलले पनि केसीको निधनप्रति दुःख ब्यक्त गर्दै पार्टीले एक राष्ट्रवादी, निष्ठावान र असल नेता गुमाएको र पार्टीलाई अपुरणीय क्षति भएको बताएका छन् ।

स्वर्गीय केसीको बिहीबार नै धार्मिक विधिपुर्वक बाँकेको सिधनियाघाटमा अन्त्यष्टी गरिएकोे राप्रपाका युवा नेता वीरेन्द्रकुमार रावतले जानकारी दिए ।