नेपालगन्ज २८ माघ : आगामी फागुन १३ गते नेपाली काँग्रेसको बाँकेसहित १६ जिल्लाको अधिवेशन हुने भएकोछ ।

नेपाली काँग्रेसको केन्द्रीय निर्वाचन समितिको शुक्रबार बसेको बैठकले यसअघि माघ १५ गतेका लागि तोकेर स्थगित भएका बाँकेसहित १६ जिल्लाको अधिवेशन फागुन १३ गते गर्ने निर्णय गरेको हो ।

केन्द्रीय निर्वाचन समितिले महाधिवेशन हुन नसकेर १६ जिल्लाको अधिवेशन केन्द्रीय महाधिवेशन पछि गर्ने निर्णय गरेका थियो ।

महाधिवेशन लगत्तै पुष २७ का लागि तोकेको जिल्ला अधिवेशन राष्ट्रियसभा निर्वाचनका कारण सारेर माघ १५ मा तोकिएको थियो । तर, कोरोना महामारीका कारण फेरि अनश्चित भएको जिल्ला अधिवेशन आगामी फागुन १३ मा तोकिएको हो ।

सचिव केशव रिजालद्वारा जारी प्रेस विज्ञप्ती अनुसार बाँके, कैलाली, अछाम, चितवन, नवलपुर, सप्तरी, सिराह, धनुषा, महोत्तरी, सर्लाही, रौतहट, वारा, पर्सा, मकवानपुर, सिन्धुपाल्चोक, सिन्धुली सहितका १६ जिल्लामा अधिवेशन बाँकी छ ।

अधिवेशन बाँकी रहेका जिल्लाभित्रका निर्वाचन क्षेत्र र वडा अधिवेशन भने माघ १० भित्रै सक्न निर्वाचन समितिले निर्देशन दिएको छ ।

उक्त विज्ञप्तीमा केही गाउँपालिका र नगरपालिकासहित वडाहरू र निर्वाचन क्षेत्रको अधिवेशन बाँकी रहेको भन्दै फागुन १० गते भित्रै अधिवेशन सक्ने उल्लेखछ । साथै कोरोना भाइरस संक्रमणको जोखिम यथावत रहेकाले स्वास्थ्य सम्बन्धि मापदण्ड पूर्ण पालना गरि अधिवेशन सम्पन्न गर्न आग्रह गरिएकोछ ।