नेपालगन्ज ४ फागुन : प्रतिनिधि सभाको बैठक शुक्रबारसम्मका लागि स्थगित भएकोछ ।

आज (बुधबार) दिउँसो प्रतिनिधि सभाको बैठक सुरु हुनसाथ प्रमुख प्रतिपक्ष नेकपा एमालेका सांसदहरुले अवरोध गरेपछि शुक्रबारसम्मका लागि स्थिगित गरिएको हो ।

यो संगै अब प्रतिनिधि सभाको अर्को बैठक शुक्रबार बस्नेछ ।

शुक्रबार दिउँसो १ बजे बस्ने गरी आजको बैठक सकिएको सभामुख अग्निप्रसाद सापकोटाले जानकारी दिए ।

बुधबारको बैठक थारु आयोगको प्रतिवेदन पेश र शोक प्रस्ताव पारित गर्दै सकिएको छ । बैठकको सुरुवातमै एमालेले अवरोध गरेको थियो ।

सभामुख अग्निप्रसाद सापकोटाले बैठकको कारबाही शुरु हुन्छ भने लगत्तै एमालेका सांसदहरुले विरोध र नाराबाजी गर्न सुरु गरेका थिए ।

बुधबारको बैठकमा अमेरिकी सहयोग परियोजना, मिलेनियम च्यालेन्ज कम्प्याक्ट (एमसीसी) सम्झौता टेबल गर्ने तयारी भए पनि अन्तिम घडीमा प्रधानमन्त्री शेरबहादुर देउवा र सत्तारुढ नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’बीच बुधबार सम्झौता टेबल नगर्ने सहमति बनेको थियो ।