नेपालगन्ज १५ फागुन : अमेरिकी सहयोग परियोजना एमसीसीमाथि संसदमा छलफल शुरु भएको छ । आईतबारको बैठकमा अर्थमन्त्री जनार्दन शर्माले नेपाल सरकार र मिलेनियम च्यालेन्ज कर्पोरेसनबीच भएको सम्झौतामाथि सामान्य छलफल गरियोस् भन्ने प्रस्ताव पेश गरेका हुन् ।

प्रमुख विपक्षी नेकपा एमालेका सांसदहरुले भने वेलमा नाराबाजी गरिरहेका छन् । सम्भवत आजको बैठकबाटै एमसीसी अनुमोदन हुनेछ ।

यसकालागि आईतबार बिहान प्रधानमन्त्री निवास बालुवाटारमा बसेको बैठकले आजै एमसीसी सम्झौता प्रतिनिधि सभाबाट अनुमोदन गर्ने निर्णय गरेको हो ।

‘आजैको दोस्रो बैठकले एमसीसी पारित गर्छ,’ बैठकपछि काँग्रेस नेता रामचन्द्र पौडेलले भने ।

२०७६ असार ३० गते प्रतिनिधि सभामा दर्ता भएको सो सम्झौता गत फागुन ८ गते प्रतिनिधि सभामा टेबल भएको थियो । तर, पास गर्नका लागि स्पष्ट बहुमत जुट्न नसक्दा त्यसयता अन्योल बढेको थियो ।

तर, सत्ता गठबन्धन आबद्ध दलहरु व्याख्यात्मक टिप्पणीसहित एमसीसी पारित गर्न सहमत भएपछि आजैको बैठकले एमसीसी अनुमोदन गर्न लागेको हो । प्रतिनिधि सभाको बैठक आज दिउँसो १ बजेका लागि बोलाइएको भएपनि ढिलो गरि शुरु भएको हो ।

यसैबीच, एमसीसीका सम्झौताका विरोधमा उत्रिएका प्रदर्शनकारी र प्रहरीबीच आईतबार झडप भएको छ ।

काठमाडौंको नयाँ बानेश्वर क्षेत्रमा प्रदर्शनकारीमाथि प्रहरीले पानीको फोहरा र अश्रुग्यास प्रहार गरेको छ । स्थिति तनावग्रस्त बनेको छ । प्रदर्शनकारीले पनि प्रहरीमाथि ढुंगामुढा गरिरहेका छन् । प्रदर्शनकारी घरेलु हतियार समेत बोकेर विरोधमा उत्रिएका छन् । सो क्षेत्रको यातायात सेवा प्रभावित बनेको छ ।