नेपालगन्ज १६ फागुनः प्रतिनिधि सभाबाट एमसीसी अनुमोदन भएपछि विभिन्न ८ दलले आज नेपाल बन्द आह्वान गरेकाछन् । बन्दका कारण यातायात, शैक्षिक संस्था, उद्योग, व्यवसाय लगायत ठप्प छ । तर, एमसीसीको विरोध गर्दै बाँकेमा बन्द गर्दै हिँडेका केही बन्दकर्तालाई प्रहरीले पक्राउ गरेकोछ ।

जिल्ला प्रहरी कार्यालय बाँकेका प्रवक्ता एवम् डिएसपी मधुसुदन न्यौपानेका अनुसार बाँकेमा सोमबार बन्द गर्दै हिँडेका ५ जनालाई नियन्त्रणमा लिइएको हो । पक्राउ पर्नेको नाम भने प्रहरीले खुलाएको छैन् । संसदबाट एमसिसी पारित भएको विरोधमा विभिन्न साना ८ दलले आज बन्द आब्हान गरेका हुन् ।

नेत्रविक्रम चन्द, मोहन वैद्य, सिपी गजुरेल, चित्रबहादुर केसी, मोहनविक्रम सिंह, ऋषि कट्टेल, आहुती, कर्णजीत बुढाथोकी नेतृत्वको पार्टीले नेपाल बन्द आह्वान गरेका छन् । प्रहरीका अनुसार बन्दको बाँकेमा खासै प्रभाव परेको छैन । पूर्वपश्चिम महेन्द्र राजमार्गमा बन्दको आंशिक प्रभाव परेता पनि यता नेपालगन्जमा भने बन्दको कुनै प्रभाव परेको छैन ।

नेपालगन्जका अधिकांश पसल, व्यवसाय, होटल, रेष्टुरेण्ट सञ्चालनमा आएकाछन् । छोटो दूरीका निजी तथा केही सार्वजनिक सवारीसाधन निर्वाधरुपमा सञ्चालनमा रहेकाछन् । नेपालगन्जको त्रिभुवन चोक, सदरलाई, भेरी अस्पताल, न्यूरोड, घरबारी टोल, पुष्पलाल चोक, धम्मबोझी लगायतका बजार क्षेत्र सञ्चालनमा आएको छ ।

जिल्ला प्रशासन कार्यालय, भूमि तथा मालपोत कार्यालय, नापी कार्यालय, अदालत, नगरपालिका लगायतका सरकारी कार्यालयहरुले सेवा निर्वाधरुपमा सेवा प्रवाह गरिरहेकाछन् । यी कार्यालयहरुमा सेवाग्राहीको उपस्थिती सामान्यरुपमा घटेपनि बन्दको खासै प्रभाव परेको छैन ।

नेपाल बन्द आह्वान गरिएपछि हुनसक्ने सुरक्षा चुनौतीलाई मध्यनजर गर्दै यी क्षेत्रमा नेपाल प्रहरी र सशस्त्र प्रहरीलाई खटाएकोछ ।