नेपालगन्ज १८ चैत्र : बाँकेमा आगामी चैत्र २३ देखि २८ गतेसम्म टाइफाइड विरुद्धको खोप लगाइदैँछ ।

सरकारले राष्ट्रिय खोप कार्यक्रममा नियमित खोपमार्फत टाइफाइड खोप पनि समावेश गरेपछि बाँकेसहित देशभर टाइफाइड विरुद्धको खोप लगाइन लागेको हो ।

योसँगै नेपालमा बालबालिकालाई लगाउने खोपको संख्या १३ पुगेकोछ छ । अहिले नेपाल सरकारले विभिन्न रोगका १२ वटा खोप लगाइरहेको छ ।

स्वास्थ्य कार्यालय, बाँकेका खोप फोकलपर्शन नरेश श्रेष्ठका अनुसार १५ महिनादेखि १५ वर्ष उमेरका बालबालिकालाई टाइफाइड विरुद्ध खोप लगाउने तयारी गरिएकोछ । बाँकेमा यो उमेर समूहमा एक लाख ४८ हजार ९ सय ३३ जना बालबालिका छन् ।

खोप अभियान अन्र्तगत १५ महिनादेखि १५ वर्ष उमेर समूहका बालबालिका स्कुलमा हुने भएकाले स्कुललाई खोप केन्द्रको रूपमा विकास गरेर अघि बढिएको फोकल पर्शन श्रेष्ठले बताए ।

फोकलपर्सन श्रेष्ठका अनुसार दुई सयभन्दा बढी विद्यार्थी भएको स्कुललाई खोप केन्द्र तोकिएकोछ । त्यसभन्दा कम विद्यार्थी भएको विद्यालयलाई नजिकको विद्यालयसँग जोडिनेछ । यसका लागि जिल्लामा २ सय ६४ वटा खोप केन्द्र निर्धारण गरिएको छ ।

खोपले टाइफाइडको किटाणु मार्ने र शरीरमा शक्ति उत्पादन गर्ने विशेषज्ञको भनाइछ । टाइफाइड पनि जनस्वास्थ्य समस्याको रूपमा रहेको छ ।

नेपालमा अझैपनि टाइफाइड रोगको उच्च संक्रमण र जोखिम रहनाका साथै अस्पताल भर्ना हुने कारणमध्ये प्रमुख पाँचभित्र रहेको देखिएको छ ।

यो खोप शुरुमा १५ महिनादेखि १५ वर्ष उमेर समूहमा देशैभर अभियानमार्फत सञ्चालन गरी त्यसपछि नियमित खोपमार्फत १५ महिनाका बालबालिकालाई निरन्तर उपलब्ध गराइने सरकारले जनाएकोछ ।