नेपालगन्ज : दुवै मृगौला फेल भएर उपचारको क्रममा रहेका हेमन्त सिहं ठकुरीको स्वास्थ्य अवस्था एकदमै गम्भीर बन्दै गएको छ । सोमबार नेपालगन्ज मेडिकल कलेज कोहलपुरले अब उपचार सम्भव नभएको भन्दै घर लैजान सुझाव समेत दिएको छ ।

सल्यान घर भई हाल कोहलपुर १ कौसिल्यानगरमा आफ्नो दिदिभिना जुसँग बसेर उपचार गराइरहेका हेमन्तको आइतबार स्वास्थ स्थिती झन जटिल बन्दै गएपछि आइसियु कक्षमा भर्ना गरिएको थियो ।

गम्भीर अवस्थामा पुगिसकेका विरामी हेमन्तकी दिदि सुमित्रासिहं ठकुरीका अनुसार डाक्टरले थप उपचार सम्भव नभएको भन्दै घर लैजान सुझाव दिएका छन् । हेमन्तको घरको आर्थिक अवस्था कमजोर रहेकाले उपचारमा सुरवाती दिनमा कठिनाई आएको थियो ।

पछि मृगौला पीडित ठकुरीलाई बचाउनका लागी विभिन्न सहयोगका कार्यक्रम गरेर केही रकम संकलन पनि गरिएको थियो । तर, उपचार हुदाँ हुदै पनि ठकुरीले आफ्नो होस गुमाउने, एक्लै बरबराउने, मान्छे चिन्न छाडेपछि आइसियु कक्षमा भर्ना गरिएको थियो।

अस्पतालले घर लैजान सुझाव दिएपछि हेमन्तको घरमा रुवाबासीनै चलेको छ । अस्पतालले नै उपचार सम्भव नभएको भनेपछि हेमन्तलाई उनको गृह जिल्ला सल्यान लगिएको छ ।