नेपालगन्ज ११ मंसिर : कोहलपुर नगरपालिका क्षेत्रभित्र अनाधिकृत रुपमा राखिएका होडिङ र फल्याक्स बोर्ड हटाइएको छ । नगरपालिकाले नगर प्रहरी प्रयोग गरेर कोहलपुर क्षेत्रका ८७२ वटा अनधिकृत होडिङ र फल्यास बोर्ड हटाएको हो ।

नगर क्षेत्रमा पर्ने पूर्वपश्चिम राजमार्ग र रत्न राजमार्गको छेउछाउमा राखिएका त्यस्ता अनधिकृत र मापदण्ड विपरीतका होर्डिङ तथा फल्यास बोर्डहरु हटाइएको कोहलपुर नगरपालिकाले जनाएकोछ ।

विज्ञापन प्रयोजनका लागि नगरपालिकाको स्वीकृतबिना राखिएका विभिन्न संघसंस्थाका २२० वटा होर्डिङ र ६५२ वटा फल्यास बोर्डहरु हटाइएको कोहलपुर नगरप्रहरी प्रमुख वीरबहादुर थापाले जानकारी दिए । उनले केहीलाई जरिवाना समेत गरिएको नगर प्रहरी प्रमुख थापाले बताए ।

‘कोहलपुर नगर क्षेत्रभित्रका अनधिकृत तथा मापदण्ड विपरीतका सबै होडिङ तथा फल्यास बोर्डहरु हटाइएको छ’ थापाले भने–‘अनधिकृतरुपमा होडिङ बोर्ड राख्नेलाई कारबाहीको दायरामा समेत ल्याएका छौं ।’

उनका अनुसार अहिलेसम्म २० हजार ५ सय रुपैयाँ जरिवाना असुल गरिएको छ । नगर प्रहरीको नियन्त्रणमा रहेका ती बोर्डहरु जरिवाना गरेर सम्बन्धित निकायलाई बुझाउने काम समेत भइरहेको पनि थापाले बताए ।

अहिलेसम्म ४१ वटा बोर्ड सम्बन्धित धनीले जरिवाना तिरेर लगिसकेका छन् । नगरपालिकाको नियन्त्रणमा रहेका होर्डिङ र फल्यास बोर्डहरु जरिवाना तिरेर लैजान ७ दिने सूचना समेत जारी रेको छ । समअवधिभित्र लिन नआएको खण्डमा नगरपालिकाले कानून अनुसार लिलामी प्रक्रिया अगाडि बढाउने तयारी गरेको छ ।

सडक पेटी खाली गराउन थालियो

यसैबीच, कोहलपुर नगरपालिकाभित्रका सडक पेटी खाली गराउन थालिएको छ । ट्रस्ट तानेर सडक पेटी कब्जा गर्ने, पसल तथा ठेलाहरु राख्ने गरेको पाइएपछि नगरप्रहरीले त्यसलाई हटाउन सुरु गरेको हो ।

मानिसहरुलाई हिडँडुलमै समस्या पर्नेगरी सडक पेटीहरु कब्जा गरिएपछि नगरपालिकाले यसअघि सात दिने सूचना जारी गरेर खाली गराउन अनुरोध गरेको थियो । सोहीअनुसार बसपार्क क्षेत्रबाट यो अभियान सुरु गरिएको नगर प्रहरी प्रमुख थापाले बताए ।

कोहलपुर नगरपालिकालाई व्यवस्थित बनाउने अभियान अन्तर्गत नगर प्रहरीले कब्जा गरिएका सडक पेटी पनि खाली गराउन थालेको हो ।

नगरपालिकाबाट खटिएका अमिनहरुले नगरक्षेत्र भित्रको सडक पेटीलाई मार्किङ गरिसकेका छन् । कतिपय व्यवसायीहरुले स्वःस्र्फतरुपमा पनि सडक पेटी खाली गरिसकेका छन् ।

यसअघि नगरक्षेत्र भित्रको फुटपाथ कब्जा गरि बसेका ठेलाहरुलाई नगर प्रहरीले हटाइसकेको छ । फुटपाथ खाली गराउने अभियानलाई अटेर गर्ने ५४ ठेला व्यवसायीलाई कारवाहीको दायरामा समेत ल्याउने काम भएको नगर प्रहरी प्रमुख थापाले बताए । उनले त्यसबाट १६ हजार राजश्व संकलन भएको पनि बताए ।

यसैगरी नगरप्रहरीले रत्नराजमार्ग अन्तर्गत कोहलपुर चौराहदेखि सुर्खेतरोड सडक खण्डको वडा नम्बर–२ सम्मको सार्वजनिक जग्गामा अतिक्रमण गरेर बसेका टहर तथा पसलहरु पनि खाली गराएको छ ।

सडकको मापदण्ड अनुसार राजमार्गको क्षेत्राधिकार भित्र थापेका करिव ६० वटा घुम्ति पसल, टहर तथा ठेला व्यवसायीहरुलाई हटाइएको हो । अब तत्काल चौराहदेखि नेपालगन्ज सडकखण्ड अन्तर्गत पार्वतीपुरसम्मको सडक अतिक्रमण समेत हटाउने तयारी सुरु गरिएको नगर प्रहरी प्रमुख थापाले बताए ।

थप समाचार

कोहलपुरमा अव्यवस्थित तारहरुको व्यवस्थापन सुरु