आईतबार, माघ २२, २०७९   १०:५७:४०

नरैनापुरमा ९९१३ जना बालबालिकाले लगाए दादुरा–रुवेला बिरुद्धको खोप


सेतोखरी   2079-10-08

नरैनापुर ८ माघ : नरैनापुरको दादुरा प्रभावित क्षेत्रका ६ महिनादेखि १५ वर्ष मुनिका ९ हजार ९ सय १३ जना बालबालिकालाई दादुरा रुवेलाविरुद्धको खोप लगाइएको छ ।

नरैनापुर स्वास्थ्य शाखा प्रमुख नगेन्द्र कुमार साहका अनुसार नरैनापुरमा १४ हजार २२ जना बालबालिकामध्ये ७०.६९६ प्रतिशत अर्थात् ९ हजार ९ सय १३ जना बालबालिकाले दादुरा–रुवेलाविरुद्धको खोप लगाएका छन् ।
सरकारले प्रभावित क्षेत्रमा दादुरा नियन्त्रण गर्ने उद्देश्यले माघ ५ गतेबाट दादुरा–रुवेलाविरुद्धको खोप अभियान सञ्चालन गरेको थियो ।

नरैनापुर स्वास्थ्य शाखाका सर्भिलेन्स अफिसर बिबेक पौडलेका अनुसार नरैनापुरका ७ वटा वडामा खोप अभियान सञ्चालन भई रहेको बताउदै सोमबारसम्म लक्ष्य अनुसार खोप लगाई सक्ने बताए ।

खोप अभियानको स्वास्थ्य कार्यालय बाँकेका खोप सुपरभाइजर नरेश श्रेष्ठ, डब्लु एचओका सर्भिलेन्स मेडिकल अफिसर डाक्टर तृप्तिपाल रमन लगायतले शनिबार खोपको अनुगमन गरेको नरैनापुर स्वास्थ्य शाखाले जनाएको छ ।
नरैनापुरमा फैलिएको दादुरा सङ्क्रमणबाट २१ जना बालबालिका सङ्क्रमित भएका छन् । सङ्क्रमितमध्ये १६ जना होम आइसोलेसनमा उपचाररत छन् भने ५ जना निको भइसकेका छन् ।

शनिबार नरैनापुर गाँउपालिका भित्र ६ वडाका ११ खोप केन्द्रमार्फत दादुरा–रुवेलाविरुद्धको खोप अभियान सञ्चालन भई रहेको नरैनापुरका प्रमुख प्रशासकिय अधिकृत मणिराम खरालले जानकारी दिए ।

यता नरैनापुर गाँउपालिका अध्यक्ष इश्तियाक अहमद शाहले खोप संचालनमा कुनै कमी हुन नदिन कर्मचारीहरुलाई निर्देशन दिदै नियमित रुपमा खोप केन्द्रको अनुगमन र स्थानीयहरु संग खोप लगाउन आग्रह गर्दै गरेकाछन् ।