नेपालगन्ज ११ वैशाख : गत वर्ष राप्ती नदीमा आएको बाढीका कारण भत्किएको तटबन्ध निर्माणका लागि आवश्यक पहल सुरु गरिएकोछ । बाँके क्षेत्र नम्बर–१ प्रदेश सभा ‘क’ की सांसद कृष्ण केसी ‘नमुना’ले बाढीले भत्काएको तटबन्ध मर्मत तथा निर्माणका लागि आवश्यक पहल सुरु गरेकी हुन् ।

राप्ती नदीमा आएको बाढीले भत्काएको तटबन्ध एक वर्ष पुग्नै लाग्दा मर्मत नभएपछि सेतोखरीले समाचार प्रकाशन गरेको थियो । सेतोखरीसंगै अन्य सञ्चारमाध्यममा उक्त समाचार प्रकाशन भएपछि सो क्षेत्रका प्रदेश सांसद नमुनाले प्रधानमन्त्री पुष्पकमल दाहाल ‘प्रचण्ड’लाई गुहारेकी छन् ।

जिल्लाको दुर्गम क्षेत्रबाट परिचित राप्तीसोनारी र नरैनापुर गाउँपालिकालाई डुबानबाट जोगाउन वर्षा सुरु हुनुभन्दा पहिले नै तटबन्ध गर्न आवश्यक देखिएको भन्दै यस्तो पहल सुरु गरिएको हो । उक्त क्षेत्रमा पर्ने राप्ती नदीको ९ वटा स्थान अति जोखिममा रहेकाले तटबन्ध निर्माण आवश्यक देखिएको छ ।

सो क्षेत्रका बासिन्दा बर्षेनी डुबान र कटानमा पर्दै आएकाछन् । यतिमात्र होइन पटक–पटक प्रयास गरिए पनि तटबन्ध नबन्दा सो क्षेत्रका सयौँ बासिन्दाले डुबान र कटान झेल्दै आएका छन् ।

आफ्नो क्षेत्रका जनतालाई डुबान र कटानबाट हुने क्षतिबाट जोगाउन राजधानी पुगेर प्रधानमन्त्री प्रचण्डलगायत सम्बन्धित मन्त्रालयका मन्त्री र सचिवलाई भेटेर विशेष आग्रह गरिएको सांसद नमुनाले सेतोखरीलाई जानकारी दिइन् ।

उनले प्रधानमन्त्री प्रचण्डले अबको दुई महिनाभित्र तटबन्ध मर्मत सम्भार र निर्माणको कार्य पुरा गर्न सम्बन्धित मन्त्रालयलाई निर्देशन दिएको समेत जानकारी दिइन् ।

सेतोखरीसँग कुरा गर्दै नमुनाले भनिन्–‘राप्तीमा तटबन्ध निर्माणको विषयलाई लिएर प्रधानमन्त्री ज्यूले जलस्रोत तथा सिँचाइ, भौतिक पूर्वाधार र गृहमन्त्रीलाई समेत बोलाएर तटबन्ध निर्माणका लागि आवश्यक बजेट विनियोजन गरि कार्य सुरु गर्न निर्देशन दिनु भएकोछ ।’

नमुनाले अगाडी थपिन्–‘यही बेला हो तटबन्ध मर्मत र निर्माण गर्ने । बर्षा लागेर पानि बस्तीमा पस्यो भने ठूलो क्षति हुन्छ । प्रधानमन्त्री ज्यूको निर्देशनसंगै छिटै टेण्डर आह्वान गरि निर्माण कार्य सुरु हुन्छ ।’

सांसद केसीले राप्तीसोनारी–७ फत्तेपुर र नरैनापुर–६ गंगापुरमा गत वर्ष भत्केको राप्तीको तटबन्ध मर्मत नहुँदा वर्षाको समय नजिकिँदै गर्दा स्थानीय बासिन्दा त्रसित र आक्रोशित भएको बताइन् ।

लुम्बिनी प्रदेशमा नयाँ सरकार गठनका विषयका कारण आफू केहि दिनपछि पुनः केन्द्रमा गएर तटबन्ध निर्माणको विषयमा ताकेता गर्ने सांसद नमुनाले सेतोखरीलाई जानकारी दिइन् ।

राप्ती नदीको विभिन्न ठाउँमा निर्माण गरिएको तटबन्धमा २०७९ असोज महिनामा आएको बाढीले ठुलो क्षति पु¥याएको थियो । राप्तीसोनारी गाउँपालिकाका अनुसार राप्तीसोनारी–७ फत्तेपुरमा मात्रै करिब ११ सय मिटर लामो तटबन्ध मर्मत गर्नु पर्ने देखिएको छ ।

यस्तै नरैनापुर गाउँपालिकाका अनुसार सो पालिकाको वडा नम्बर–६ गंगापुरमा करिब डेढ सय मिटर क्षेत्र तटबन्ध मर्मत गर्नुपर्नेछ भने दुवै पालिकामा नौ स्थानमा नयाँ तटबन्ध निर्माण गर्नु पर्ने अति आवश्यक रहेको छ ।

थप समाचार

बाढीले भत्काएको तटबन्ध एक वर्ष पुग्नै लाग्दा मर्मत भएन, १० हजार मानिसको ज्यान जोखिममा