नेपालगन्ज २४ वैशाख : बाँकेको नरैनापुर गाउँपालिकाका विद्यालय तथा मदरसामा आईतबार छडके चेकजाँच गर्ने क्रममा विद्यालयमा उपस्थिति नै नभई शिक्षकहरुले तलब लिएको पाइएको छ ।

गाउँपालिकाको वडा नम्बर–५ का अध्यक्ष एवम् शिक्षा अनुगमन तथा छानविन समितिका संयोजक कृष्णचन्द्र मौर्यसहितको टोलीले विद्यालयको छडके अनुगमनका क्रममा विद्यालयमा शिक्षकको उपस्थिति नभएको, महिनौ दिनसम्म पनि विद्यालयमा उपस्थित नभई तलब लिएको, शिक्षकहरुले हप्तौँ दिनसम्म हाजिरी नगरेको पाइएको हो ।

अनुगमनका क्रममा नरैनापुर गाउँपालिका वडा नम्बर–४ जयरामपूर्वामा रहेको मदरसा अहले सुन्नत सैयदुल उलुमकी शिक्षिका जयमती बैजाली र खाजा व्यवस्थापक रामजी साहु वैशाख महिनामा एक दिन पनि मदरसा नआएको पाइएको छ । भने चैत महिनामा पनि शिक्षिका जयमती २ दिन र खाजा व्यवस्थापक रामजी एकदिन मात्रै मदरसा आएका थिए ।

अचम्म त उनीहरुले मदरसामा नआएपछि तलब भने पाइरहेका छन् । उनीहरु दुवैलाई गाउँपालिकाले राहतमा खटाएका कर्मचारी हुन् । यस विषयमा मदरसाका प्रध्यानाध्यपक ईब्राइम खानले उनीहरुलाई बारम्बार सम्पर्क गर्दा पनि मदरसा नआउने गरेको बताउँछन् । ‘उहाँहरुलाई हामीले धेरैपटक फोन गरेका छौं । गाउँपालिकामा पनि निवेदन दिएका छौं । तर, पनि उहाँहरु मदरसामा आउनु हुँदैन,’ खानले भने,‘तर तलब भने उहाँहरुले पाइरहनु भएको छ ।’

त्यस्तै वडा नम्बर–५ मा जमुनहामा रहेको मदरसा गौसुलवरा जामिया अहिले सुन्नतमा अनुगमनका क्रममा संयोजक मौर्यसहितको टोली पुग्दा प्रध्यानाध्यापक नै भेटिएनन् । भने शिक्षकहरुको हाजिरी रजिष्टर माग्दा आफूहरुलाई थाहा नभएको शिक्षकहरुले बताए ।

संयोजक मौर्यले हाजिरी रजिष्टर दिन दबाब दिएपछि मात्र शिक्षकहरुले हाजिरी रजिष्टर देखाउँदा उक्त हाजिरी रजिष्ट्ररमा कुनै पनि शिक्षकले वैशाख महिनामा हाजिरी गरेको पाइएन । त्यस्तै मदरसामा कति विद्यार्थी अध्ययनरत छन् ? भने प्रश्न गर्दा कोही पनि शिक्षकले त्यसको उत्तर दिन सकेनन् ।

एकजना शिक्षकलाई किन हाजिरी नगर्नु भएको भनेर संयोजक मौर्यले प्रश्न गर्दा उनले नयाँ आर्थिक वर्षको हाजिरी रजिष्टर नै नबनाएको जवाफ दिए ।

यस्तै बेतिथि वडा नम्बर–४, जमुनहामा रहेको नेपाल राष्ट्रिय आधारभूत विद्यालयमा पनि देखियो । अनुगमनका क्रममा उक्त विद्यालयमा पनि प्रध्यानाध्यपक भेटिएनन् । कुनै कक्षा कोठा शिक्षक नै अउपस्थिति नभएको पाइयो ।
अचम्म त ३ जना शिक्षक/शिक्षिकाले त एकैपटक आएको र गएको हाजिरी लगाएको पनि पाइयो भने केही कक्षामा विद्यार्थीको पनि हाजिरी नगरेको पाइयो । साथै धेरैजसो शिक्षकले हप्तौदिनदेखि हाजिरी नै नगरेको पनि पाइयो ।

यस विषयमा संयोजक मौर्यले प्रश्न गर्दा शिक्षक/शिक्षिकाहरु नयाँ वर्ष भएको, कक्षा भर्खर सुरु भएको, कोही छुट्टीमा भएको जस्ता जवाफ दिएर समस्यालाई लुकाउने खोजे भने केही शिक्षकले अनुगमन कै क्रममा विद्यार्थी र स्वयम् शिक्षक÷शिक्षिकाले हाजिरी गरे ।

सो क्रममा अनुगमनका क्रममा सबै विद्यालय तथा मदरसामा केही न केही त्रुटी, समस्या देखिएको संयोजक मौर्यले बताए । ‘यो पहिलोपटक हामीहरु यसरी छडके अनुमगनमा गएका हौं । त्यसैले सबै विद्यालय र मदरसालाई मौखिक चेतावनी दिएर आएका छौ,’ मौर्यले भने, ‘ अर्कोपटक फेरि अनुमगनमा जाने छौं । यस्तै समस्या देखियो भने कारबाही गर्ने छौं ।’

थप समाचार

नरैनापुरका मदरसा ‘खारेज’ गर्दै अध्यक्ष शाह, शुक्रबारदेखि विद्यार्थी भर्ना अभियान