नेपालगन्ज १० जेठः भेरी अस्पताल विकास समितिका पदाधिकारीको बिदाई गरिएको छ । अस्पताल विकास समितिका अध्यक्ष प्रमोद धिताल, सदस्यहरु सरस्वती मल्ल, कृष्ण प्रसाद श्रेष्ठ र धनराम ओलीलाई बुधबार एक कार्यक्रमकाबीच बिदाई गरिएको हो ।

स्वास्थ्य तथा जनसंख्या मन्त्रालयका सचिव डाक्टर रोशन पोख्रेलले कदरपत्रसहित सम्मान गर्दै समितिका पदाधिकारीलाई विदाई गरे । सोक्रममा उनले अस्पताल विकास समितिले अस्पतालको बृद्धि विकासका लागि खेलेको भूमिकाको खुलेर प्रंशसा गरे ।

‘कैयौं अस्पताल विकास समितिको ध्यान आफ्ना कार्यकर्ता भर्ती गर्नतर्फ केन्द्रित भएको मैले आफै देखेकोछु’ उनले अगाडी थपे–‘समितिले सधैं अस्पताल विकासको सवालमा काम गरेको पाइयो । त्यसैले पनि अस्पतालको अवस्था यहाँसम्म आएको हो ।’

भेरी अस्पताल विकास समितिका पदाधिकारीलाई २०७७ साल जेठ १३ गते स्वास्थ्य तथा जनसंख्या मन्त्रालयले तीन वर्षीय कार्यकालका लागि नियुक्त गरेको थियो । उनीहरुको तीन वर्षीय कार्यकाल यहि जेठ १३ गते पूरा हुँदैछ ।

बिदाई कार्यक्रममा आफ्नो मन्तव्य राख्दै भेरी अस्पताल विकास समितिका सदस्य धनराम ओलीले अस्पतालको वृद्धि विकासका लागि ३६ महिनाको कार्यकालमा अस्पताल विकास समितिले महत्वपूर्ण भूमिका निर्वाह गरेको बताए । उनले अस्पतालकै वृद्धि विकासका लागि अस्पताल विकास समितिको ५० पटक बैठक बसेको पनि जानकारी दिए ।

उनले यो अबधिमा डाक्टर प्रकाश थापा, डाक्टर बीरेन्द्र बहादुर चन्द र डाक्टर बद्री चापागाईं गरी तीन जना मेसुसंग समन्वय र सहकार्य गरेर काम गर्ने अवसर मिलेको भन्दै खुसी व्यक्त गरे ।

अस्पताल स्थापनाको १३१ वर्षपछि पहिलो पटक समितिले स्थापना दिवस मनाउने कार्यको सुभारम्भ गरेको जानकारी दिदैँ उनले अस्पतालको स्तरोन्नति र विकासमा सकेसम्म नीतिगत तहमा दबाब दिने काम गरेको उल्लेख गरे ।
भेरी अस्पताललाई बिशिष्टिकृत अस्पताल भनिएपनि जनशक्तिको अभाव चरम रहेको भन्दै मन्त्रालयको ध्यानाकर्षण गराइएकोछ । भेरीमा अझैँ एक हजार ३ सय ७६ जना कर्मचारी आवश्यक रहेकोे छ ।

स्वास्थ्य तथा जनसंख्या मन्त्रालयका सचिव डाक्टर पोख्रेलले इमर्जेन्सी कक्ष स्तरोन्नती तथा स्थानान्तरण कार्यक्रममा सहभागी भएकाले त्यहीँ मौका छोपेर औपचारिक कार्यक्रमका बीच उनीहरुको बिदाई गरिएको अस्पतालले जनाएको छ ।