नेपालगन्ज ५ असार : तातो हावाको लहर सबै वर्ग समुहलाई हुने भएकोले जोखिमलाई कम गर्न जनचेतना अभिबृद्धि नै उत्तम उपाय हो । यसका लागि स्थानीय तह र सरोकारवाला निकायको भूमिका महत्वपूर्ण हुने शिक्षकहरुले बताउँनछन् ।

नेपालगन्ज उपमहानगरपालिका क्षेत्रका सामुदायिक र मदरसाहरुमा तातो हावा (लू) जोखिम न्यूनिकरण सम्बन्धित अभिमुखिकरणका क्रममा उक्त कुरामा जोड दिएका हुन् ।

तापक्रम बृद्धि हुनसाथ नगरभित्रका विद्यालय बन्द भइ हाल विहानको समयमा सञ्चालन भइरहेका छन् ।

तातो हावाको लहर (लु) को जोखिमबाट बच्न अहिले नेपाल रेडक्रस सोसाइटी बाँके शाखाले नगरभित्रका २० सामुदायिक विद्यालय र मदरसाहरुमा जनचेतनामुलक गतिविधि सञ्चालन गरिरहेको नेरेसो बाँके शाखाका मन्त्री अजीज अहमद सिद्धिकीले बताए । उनले देशकै सबभन्दा बढी गर्मी हुने शहर नेपालगन्जमा रेडक्रसले ‘हिटवेभ’ सम्बन्धी नमुना कार्यक्रम सञ्चालन गरिरहेको बताए ।

अभिमुखीकरणका क्रममा तातो हावाको लहरले गर्दा हुने विरामीका संकेतहरु कसरी पहिचान गर्ने, बृद्धि मानिसहरुलाई अत्याधिक गर्मीबाट कसरी सुरक्षित राख्ने, गर्मीमा के–के खानुपर्दछ, अत्याधिक गर्मीको जोखिम कसलाई हुन्छ, निर्माण कामदार र बालबालिकाहरुलाई अत्याधिक गर्मीबाट कसरी सुरक्षित राख्ने, तातो हावाको लहरबाट हुने मृत्युहरु रोकथाम र प्राथमिक उपचारको बारेमा सचेतिकरण गरिएको थियो ।

उक्त अभिमुखीकरणको सहजीकरण नेरेसो बाँके शाखाका उपनिर्देशक दोलखबहादुर डाँगी, बरिष्ठ संगठन विकास अधिकृत निरञ्जना मल्ल, लेखा अधिकृत झबीलाल शर्मा, कार्यक्रम अधिकृत प्रहलाद विश्वकर्मा र सूचना व्यवस्थापन अधिकृत रुपन ज्ञवालीले गरिरहेकाछन् ।

गर्मीको समयमा तिर्खा नलागे पनि बेला–बेलामा पानी पिईरहनुपर्छ । शरीरमा पानीको मात्रा कम हुन दिनु हुदैन । घरभित्रै बस्नुपर्दछ । चिसो पानीले नुहाउने, खुकुलो र हलुका उज्यालो रंगको लुगा लगाउने तथा कफी, मध्यपान लगायतका पेय पदार्थ पिउनु हुँदैन । गर्मीको समय तथा लू चलेको बेला विशेषगरि बिहान ११ देखि दिउँसो ४ बजेसम्म सकभर घर बाहिर निस्कनु हुँदैन ।