नेपालगन्ज १५ चैत्र : यस वर्षको माध्यमिक शिक्षा परीक्षा (एसईई) सुरु भएको छ । परीक्षा २७ गतेसम्म चल्ने छ । आज पहिलो दिन परीक्षार्थीहरुले अनिवार्य अंग्रेजी विषयको परीक्षा दिइरहेका छन् । बिहान ८ बजेदेखि सुरु भएको परीक्षा ११ बजे सकिने छ ।

यो वर्ष बाँके जिल्लाबाट नौ हजार २९३ जना परीक्षार्थीले माध्यमिक शिक्षा परीक्षा (एसईई) दिँदैछन् । एसईईमा चार हजार ७६३ छात्र र चार हजार ५३० छात्रा सहभागी भएको शिक्षा विकास तथा समन्वय इकाई बाँकेको कार्यालयले जनाएको छ । 

परीक्षाका लागि बाँकेमा ३४ परीक्षा केन्द्र तोकिएका छन् । शिक्षा विकास तथा समन्वय इकाई बाँकेका अनुसार, नेपालगञ्ज उपमहानगरपालिकामा ९, कोहलपुर नगरपालिकामा १०, बैजनाथ, राप्तीसोनारी र खजुरा गाउँपालिकामा चार÷चार, डुडुवा, नरैनापुर र जानकी गाउँपालिकामा एक÷एक वटा परीक्षा केन्द्र राखिएका छन् ।

यसैबीच, एसईई परीक्षाका लागि सामुदायिक तथा संस्थागत गरी  देशभरबाट १० हजार ८०६ विद्यालयका २ लाख ५० हजार ७७२ छात्रा, २ लाख ५३ हजार ६२७ छात्र र यौनिक तथा लैंगिक अल्पसंख्यक १५ जना गरी कुल ५ लाख ४ हजार ४१४ जना परीक्षार्थीले फारम भरेका थिए । परीक्षाका लागि २ हजार ६४ परीक्षा केन्द्र तोकिएको छ ।

विगतका एसईई परीक्षामा सैद्धान्तिक र प्रयोगात्मक दुवै जोडेर ३५ प्रतिशत अंक ल्याउनुपर्ने प्रावधान रहेकामा यस वर्षदेखि विद्यार्थीले सैद्धान्तिकमा ३५ र प्रयोगात्मकमा ४० प्रतिशत अंक ल्याउनैपर्ने परीक्षा नियन्त्रण कार्यालयले जनाएको छ ।

३५ प्रतिशतभन्दा कम अंक ल्याएमा कक्षा ११ मा भर्ना हुन पाइँदैन । त्यस्ता परीक्षार्थीहरुले मौका परीक्षा भने दिन पाउने छन् ।