नेपालगन्ज ४ जेठ : ‘बर्फानी बाबा’ मन्दिरमा खानेपानीको काम अन्तिम चरणमा पुगेको छ । खानेपानीको काम अन्तिम चरणमा पुगेसंगै बाँकेको राप्तीसोनारी गाउँपालिका–४ स्थित चुरे पहाडमा अवस्थित धार्मिक पर्यटकीय स्थल ‘बर्फानी बाबा’ मन्दिरमा पानीको समस्या हट्ने भएको हो ।

यही महिना भित्रमा ‘बर्फानी बाबा’मा पानी पु¥याउने र भवन निर्माणको काम पनि सम्पन्न भइसक्ने तयारी गरिएकोछ । धार्मिक पर्यटकीय स्थल ‘बर्फानी बाबा’मा नेपाल र भारतका हिन्दु धर्मावलम्बी भक्तजनहरूको घुइँचो लाग्ने गर्दछ ।

नेपालका विभिन्न स्थानका साथै भारतसम्मबाट ‘बर्फानी बाबा’ मन्दिर दर्शन गर्न आउने भक्तजनहरूका लागि बस्नका लागि आवास र पिउने पानीको समेत व्यवस्था हुन नसक्दा भक्तजनहरू समस्यामा पर्ने गरेका थिए । अब भवन निर्माणका साथै खानेपानीको काम पनि सम्पन्न भएपछि भने उक्त क्षेत्रमा आन्तरिक तथा बाह्य पर्यटकको आवागमनमा बृद्धि भई स्थानीयको आर्थिक उपार्जनमा समेत टेवा पुग्ने विश्वास गरिएको छ । 

लुम्बिनी प्रदेश सभा सदस्य एवम् पूर्वमन्त्री कृष्णा केसी ‘नमुना’को पहलमा बर्फानी बाबा मन्दिर परिसरमा खानेपानीको कार्यले अन्तिम रुप लिदैछ । लामो समयदेखिको जनताको माग रहेको सो मन्दिरमा खानेपानी पु¥याउने कार्य अन्तिम चरणमा पुगेको नमुनाले बताइन् ।

कुम्भरमा डिप बोरिङ गाडेर बोरिङमार्फत् करिब साढे सात किलोमिटर टाढा ‘बर्फानी बाबा’ मन्दिरमा पानी पु¥याउने कार्य द्रुत गतिमा भइरहेको उनले बताइन् ।

कुम्भरमा डिप बोरिङ गाड्ने काम सम्पन्न भएको उनले जानकारी दिदै कुम्भरबाट ‘बर्फानी बाबा’ मन्दीरसम्मको करिब साढे सात किलोमिटर लामो दुरीमा पाइप बिछ्याउने काम भइरहेको र करिब आधाभन्दा बढी दुरीमा कार्य सम्पन्न भएको नमुनाले बताइन् ।

बाँकेकै अति नै लोकप्रिय तथा दुर्गम स्थानमा रहेको ‘बर्फानी बाबा’ मन्दिर रहेको डाँडामा पानी सङ्कलन गर्नका लागि ३५ हजार लिटर क्षमताको पानी ट्याङ्की निर्माणको काम पनि अन्तिम चरणमा पुगेको छ ।  त्यसैगरी मन्दिर क्षेत्रमा भक्तजनहरूको आवासका लागि भवन निर्माणको कार्य पनि अन्तिम चरणमा पुगेको उनले बताइन् ।

खानेपानीका लागि प्रदेश सरकारको ७० लाख रुपैयाँको बजेट र भवन निर्माणका लागि ८० लाख रुपैयाँको बजेट आफूले विनियोजित गरेको उनले जानकारी दिदैँ निर्माणाधीन भवनको पहिलो तलाको ढलानको काम सकिएको र अब माथिल्लो तलाको काम सुरु हुने जानकारी दिइन् ।