लखनऊ(यूपी–भारत) २३ असार : नेपाल–भारत सीमामा ‘मित्र वन’ बनाइने भएकोछ । भारतको उत्तर प्रदेश सरकारले नेपालसँगको सीमाक्षेत्रमा ‘मित्र वन’ बनाउने घोषणा गरेको हो । 
योगी आदित्यनाथको सरकारले आफ्नो ‘वृक्षरोपण जनअभियान–२०२४’ अन्तर्गत उक्त वनको घोषणा गरेको छ ।

मित्र वन बनाउन ३५ क्षेत्र छुट्ट्याइएको जनाइएको छ । मुख्यमन्त्री योगी आदित्यनाथको निर्देशनानुसार वन विभागका कर्मचारी उक्त अभियानका निम्ति सक्रिय भएर लागेका छन् ।

अभियानअन्तर्गत ३५ करोड बिरुवा रोपिनेछ । अभियान यही जुलाई २० देखि सुरु हुनेछ । नेपालसँग सीमा जोडिएका सबै जिल्लामा यसको तयारी भइरहेको जनाइएको छ ।

मुख्य रूपमा महाराजगञ्जका सुनौली, लखिमपुर खेरी, श्राबस्ती, बहराइच, पिलभीतलगायत सीमावर्ती क्षेत्रमा वृक्षरोपण गरिनेछ । त्यसक्रममा सीमाक्षेत्रका नेपालका प्रतिनिधिसँग समेत संयुक्त रूपमा काम गरिने जनाइएको छ ।

योगी आदित्यनाथले भारतका प्रधानमन्त्री नरेन्द्र मोदीको ‘एक पेड मा के नाम’ अभियानलाई साथ दिन यो अभियान ल्याएका बताइएको छ । 

नेपालको बाँके जिल्ला भारत उत्तरप्रदेश राज्यको बहराईच जिल्लासँग ६५ किलोमिटरको सीमा क्षेत्रफल रहेकोछ । भारतसँग बाँकेको नेपालगन्ज उपमहानगरपालिकासंगै राप्तीसोनारी, नरैनापुर, डुडुवा, जानकी र खजुरा गाउँपालिकाको सीमाना जोडिएकोछ ।

‘मित्र वन’ले नेपाल–भारत सीमा जोडिएका क्षेत्रमा रहेका नेपालका सामुदायिक वन संरक्षणमा समेत टेवा पुग्ने अपेक्षा राखिएकोछ । यी वनजङ्गल हुँदै वन्यजन्तु दुईदेश ओहोरदोहोर समेत गर्ने गर्छन् ।