नेपालगन्ज २५ कार्तिक : खैरो हेरोइन र चरेससहित ५ जनालाई जिल्ला प्रहरी कार्यालय कैलालीले नियन्त्रणमा लिएकोछ । 

कैलालीको धनगढी उपमहानगरपालिका वडा नम्बर–२ रामजानकी मन्दिर नजिकबाट तीन जना र धनगढी उपमहानगरपालिका वडा नम्बर–३ भन्सार नजिकबाट दुई जना गरि पाँच जनालाई प्रहरीले नियन्त्रणमा लिएको हो । 

प्रहरीले पक्राउ गरेकोमा धनगढी उपमहानगरपालिका वडा नम्बर–२ बस्ने २३ वर्षीय रोशन खड्का, १६ वर्षीय देव शर्मा र २१ वर्षीय अमित शर्मालाई शङ्का लागि चेकजाँच गर्दा उनीहरूको साथबाट शुद्ध तौल १५० मिलिग्राम खैरो हिरोइन, एक ग्राम ५६० मिलिग्राम चरेस फेला परेपछि प्रहरीले नियन्त्रणमा लिएको हो । 

यस्तै धनगढी उपमहानगरपालिका–३ भन्सार नजिकबाट धनगढी–१३ बस्ने १९ वर्षीय नीरज राना र २१ वर्षीय सुनिल रानालाई ५ ग्राम ८४० मिलिग्राम लागु औषध (खैरो हेरोइन) र ५ ग्राम ९९० मिलिग्राम खैरो हेरोइन, एक ग्राम ५६० मिलिग्राम चरेससहित पक्राउ गरिएको हो । 

पक्राउ परेका पाँचै जनालाई नियन्त्रणमा लिई आवश्यक कारबाहीको लागि हिरासत राखी थप अनुसन्धान भइरहेको जिल्ला प्रहरी कार्यालय कैलालीले जानकारी दिएको छ ।