नेपालगन्ज २१ मंसिर : नेपाल सरकारले तीन प्रकारका विषादी प्रतिबन्धित लगाएको छ । सरकारले नेपाल राजपत्रमा सूचना जारी गर्दै पाराक्वाट, क्लोरपाइरिफोस र फोरेट नामक विषादी प्रतिबन्ध लगाएको हो । 

शुक्रबार प्रकाशित सूचनामा सो विषादी उत्पादन, संश्लेषण, आयात, निर्यात, व्यावसायिक प्रयोग, भण्डारण, बिक्री वितरण र ओसारपसारमा प्रतिबन्ध लगाइएको उल्लेख छ । बाँकी रहेका विषादीहरू पाराक्वाट र क्लोरपाइरिफोस दुई वर्षभित्र समाप्त÷प्रयोग गरिसक्नु पर्नेछ । 

जनस्वास्थ्य तथा वातावरण प्रवर्धन केन्द्र (सेफेड) ले यी विषादी र विषाक्त रसायनहरूका विषयमा लामो समयदेखि काम गर्दै आएको छ । 

जीवनाशक विषादी व्यवस्थापन ऐन, २०७६ को दफा २२ ले दिएको अधिकार प्रयोग गरि जीवनाशक विषादी व्यवस्थापन समितिले झारपात नाशक (पाराक्वाट) तथा क्लोरपाइरिफोस र फोरेट (कीट नाशक) विषादी पूर्णरुपमा प्रतिबन्ध लगाएको सिफेडका कार्यकारी निर्देशक रामचरित्र साहले जानकारी दिए । उनले प्रतिबन्ध लगाइएको विषादीको प्रभावकारी कार्यान्वयनको माग समेत गरे ।