नेपालगन्ज : भेरी अस्पतालमा लामो समयदेखि थुपारिएको फोहोर व्यवस्थापन गरिदैंछ । नेपालगन्ज उपमहानगरपालिकाको सहयोगमा अस्पताल व्यवस्थापन समितिले उक्त फोहोर व्यवस्थापनको काम थालेको अस्पतालका प्रमुख डाक्टर प्रकाशबहादुर थापा बताउँछन् ।

अस्पतालको प्रमुख भएदेखि फोहोर व्यवस्थापनका बिषयमा गम्भीर देखिएका डाक्टर थापालाई केही दिनअघि अस्पताल व्यवस्थापन समिति नियुक्त भएपछि काममा सहजता भएको हो ।

अस्पतालमा एक वर्षदेखि फोहोर थुपारिएको थियो । उक्त फोहोरा शनिबार विहानदेखि उपमहानगरपालिकाले उठाउन सुरु गरेको छ । अस्पतालमा उत्पादन भएका फोहर तथा फोहरजन्य बस्तु विसर्जन गर्ने ठाउँ नपाउँदा एक वर्षदेखि अस्पताल परिसरमा नै थुपारिएको प्रमुख थापा बताउँछन् ।

भेरी अस्पताल विकास समितिले उपमहानगरपालिकालाई अस्पतालको फोहोरो व्यवस्थापनमा ध्यान दिन आग्रह गरेपछि उपमहानगरपालिकाले शनिबारबाटै फोहोर उठाउन थालेको उपमहानगरपालिकाका मेयर डाक्टर धवलशम्शेर राणा बताउँछन् ।

अस्पतालमा उत्पादन हुने फोहर ब्यवस्थापन चुनौतीको रुपमा देखिने गरेको अस्पतालका अध्यक्ष प्रमोद धिताल बताउँछन् । भेरी अस्पताल परिसरमा करिब १० ट्रक फोहोर रहेको उपमहानगरपालिकाले बताएको छ ।