नेपालगन्ज : कोरोना संक्रमित उपचारका लागि बनाइएको बाँकेको कोरोना विशेष अस्पताल सिल गरिएको छ । उक्त विशेष अस्पतालका दुई चिकित्सकसहित १० जनामा कोरोना संक्रमण देखिएपछि सिल गरिएको हो ।

बाँकेको खजुरास्थित सुशील कोइराला प्रखर क्यान्सर अस्पतालका दुईजना चिकित्सकसहित १० जनामा कोरोना भाइरस संक्रमण पाइएको छ ।
अस्पतालका प्रमुख विश्वराम पौडेलका अनुसार, दुईजना चिकित्सक, तीनजना प्रशासन शाखाका कर्मचारी, एकजना नर्स र पाँचजना अस्पताल सहयोगीलाई कोरोना भाइरस संक्रमण देखिएको हो । यसअघि अस्पतालका गाडी चालकलाई पनि कोरोना भाइरस संक्रमण देखिसकेको छ ।

अस्पतालमा कार्यरत दुई चिकित्सक सहित दश जनामा कोरोना भाइरस संक्रमण देखिएपछि अन्य सबै चिकित्सिक, स्वास्थ्यकर्मी र कर्मचारी सेल्फ क्वारेन्टिन बसेका छन् ।

उनीहरुको पीसीआर परीक्षणको तयारी भइरहेको छ । अस्पतालमा ४२ जना कार्यरत छन् । यद्यपी अस्पतालमा कसरी भाइरस छिर्यो ? भन्नेबारे थाहा हुन सकेको छैन् । विरामीबाटै सर्यो वा अस्पतालकै कर्मचारीबाट सर्यो थाहा हुन नसकेको प्रमुख पौडेलले बताए ।

प्रदेश सरकारले क्यान्सर अस्पताललाई कोरोना विशेष अस्पताल बनाएपछि अस्पतालले आफ्ना नियमित सेवा रेडियोलोजी भवनबाट दिदै आएको थियो ।